Pagpakabana o himantayon

Hain may mas disente paminawon o buhaton: ang pagpakabana o pagkahimantayon?

Alang sa uban kana konong duha ka pulong walay kalainian, ug managsama ra ang kahulogan kay alang kanila pulos man kono nagtutok ngadto sa kinabuhi sa ubang tawo.

Apan alang kanako, kanang duha ka mga pulong nga atong gihisgotan karon, duha ka mga pulong nga managlahi ang kahulogan ug mas disente paminawon ug buhaton ang pulong pagpakabana.

Tinuod nga kanang duha ka mga pulong pulos nagtutok ngadto sa kinabuhi sa ubang mga tawo, apan ang pagpakabana mosentro lang sa iyang pagtutok ngadto sa mga problema sa ubang tawo kun kini nagkinahanglan ba og panabang sa uban o wala.

Apan ang tawo nga himantayon hapit tanang aspeto sa kinabuhi sa uban ilang tutokan ug kun mahimo ilang utingkayon ang tanang tinagoan bahin sa kinabuhi hangtod makuha nila ang tanang impormasyon, ug kutob sa ilang mahibaw-an, ila dayon ipanabi ngadto sa ubang mga tawo bisan kun wala kini mangutana.

Sa ato pa,  ang himantayon may intensyon pagdaut sa dungog sa ubang tawo kay iapil man nila sa pagpanabi ang mga hiwi o dautan nga binuhatan  sa uban.

Ang pagkabana usa ka dalaygon nga buhat, apan ang pagkahimantayon usa ka buhat nga salawayon nga dili angay molambo diha sa usa ka Kristiyano nga katilingban. Kitang mga Pinoy, maayo kaayo kitang mopagarpar nga ang Pilipinas "is the only Christian country in Asia and the Far East.''

Kun tinuod kini, wala unta kitay makitang tawo nga himantayon dinhi sa atong nasud. Daghan tingali  ang mangatawa kun atong ipamugos ang pagpatuo nga walay Pinoy nga himantayon. Mao nga kinahanglan nga atong dawaton ang kamatuoran nga niay daghang mga himantayon nga mga tawo sa atong palibot.

Dili nato kini angay ikasakit o kasagmuyo kay sila mao kadtong mga tawo nga gihisgotan ni Kristo sa dihang mihangyo siya ngadto sa iyang Amahan nga nagkanayon, "Amahan ko pasayloa sila kay wala sila mahibalo sa ilang gibuhat."

Ang gipaabot ni Kristo nga kun nahibalo pa unta ang maong mga tawo sa kadautan sa ilang gibuhat dili unta nila kadto buhaton.

Busa tungod niini ug alang sa kaluwasan sa kalag niadtong mga tawo nga anaa pa sa gahom sa kangitngit ug wala pay kahayag sa ilang kaisipan ug nagpadayon pa sa ilang hiwing kinaiya pagkahimantayon, awhagon nako nga magsusi ug magpakabana na sila alang sa ilang kaluwasan.

Kinahanglan nga ang mga pulong o kasuguan ni Kristo nga naa sa kasulatan mao nay gamiton nga giya sa kinabuhi alang sa pag angkon sa kinabuhing dayon.

Kini lang ang bugtong paagi nga atong nakita nga ato nang mapuy-an ang kinaiya sa pagpakabana ug kalimtan na ang pagkahimantayon.