Unsa  man lang ang nagpabiling barato karon?

Sa atong madungog sa mga sibya sa mga radio ug TV ug mabasa sa mga pamantalaan nag iyahay na og saka ang mga presyo sa mga palaliton diha sa atong mga merkado.

Daw naglumbaay sila paingon sa itaas. Gihinayhinay na tingale pag abli sa Ginoo ang pultahan aron makasulod na ang gitakda Niya nga timailhan nga Siya hapit na mobalik nganhi sa kalibutan aron maghari sulod sa usa ka libo ka mga tuig (1000 yrs).

Kini nga timailhan mao ang gitawag Niya nga dakong alantoson (great tribulation) ug sa tanang mga ilhanan nga gihinganlan ni Hesukristo kini na lang ang wala pa nato makita o masaksihi, tungod kay wala pa kini mahitabo sukad masukad ug dili na usab mahitabo  pa pag-usab.

Kun matinuod nga kini na ang sinugdanan sa maong alantoson, dili na gayod madugay ato na makita pag-usab ang atong manunubos nga mobalik na nganhi sa kalibotan ug maghari na uban kanato sulod sa usa ka libo ka mga katuigan.

Ug human sa usa ka libo ka tuig, isunod dayon sa Diyos ang paghukom sa kalibotan ug kadtong nag-alagad ug matinud-anon nga misunod sa mga kasugoan ni Kristo, modawat na sa ilang ganti gikan sa Diyos nga mao ang kinabuhing dayon ug kalipay nga walay katapusan.

Kadtong mga gidimalas nga wala lang magpakabana kay gibaliwala lang nila ang mga kasugoan ni Kristo modawat usa sa silot nga gitagana sa Diyos kanila nga mao ang walay katapusang kalayo sa impyerno.

Karon dinhi sa kalibotan, kining pagsige og saka sa mga presyo sa tanang mga palaliton, usa kini ka dakong alantoson sa katawhan kay ang linugdangan niini mao ang dakong  kagutom alang sa mga tawo, labi na gayod kadtong mga kabus ug mga tawong walay trabaho o pangita. Uban sa dakong gutom, modasmag usab ang nagkalainlaing mga sakit ug kadaghanan moresulta sa kamatayon.

Tungod niini, magsipok na ang kaisipan sa katawhan ug dili na makahunahuna kun unsay maayo o matarong. Pugson na nila ang ilang kaugalingon sa pagbuhat sa dautan basta lang mabuhi ang ilang pamilya. Sa maong higayon, dakong kasamok o kagubot ang mapaabot nato.

Ang baratong pagkaon o palaliton mao lang ang makasulbad o makapugong niining makalilisang nga situwasyon; apan makapaabot pa ba kaha kita nga mobalik sa pag us-os ang bili sa mga palaliton? Sa akong paniid, daw lisod na kini mahitabo, tungod kay ang Diyos sa langit nga dili mamakak mao ang mipahibalo kanato niini.

Karon kun atong tutokan pag-ayo ang tinuod nga kahimtang sa kalibutan, atong makita nga usa na lang ka butang ang nagpabiling barato karon, ug kini mao ang kinabuhi sa tawo, tungod kay para sa mga tulisan, mas mahal pa ang kinabaratohan nga cellphone kay sa kinabuhi sa tawo nga ilang tulison tungod kay dili na sila magduhaduha sa pagpatay kun magdumili ka paghatag sa imong cellphone. Mao nga maka ingon ta nga mas barato pa ang kinabuhi sa tawo karon kay sa presyo sa cellphone. Busa mga igsoon, angay ba kita magpasalamat niining atong kahimtang nga ania pay  usa ka butang sa atong katilingban nga nagpabilin nga barato kaayo? Kamo lang ang makatubag ning maong pangutana.