Usa ra ba si Hesukristo ug ang Diyos amahan?

San Remegio, Cebu

Ang pagpuyo kon pagpakabuhi nato dinhi sa kalibotan pulos giliminan sa mga misteryo ug tanghaga kay wala pay tawong namatay ug mibalik dinhi sa kalibotan. Sigon sa nahisulat sa balaang kasulatan kon bibliya si Hesukirto kuno ug ang Diyos Amahan usa ra ka persona ug mao  rang usa.

Sa pagbasa nato sa nahisgotang libro ang Old Testament nagasaysay sa mga binuhatan ug mga milagro nga gihimo sa Diyos Amahan gikan sa kang Adan ug Eva hangtod na kang Noe nga siya ra ug ang iyang pamilya lakip na ang mga kahayopan sa Arka ang naluwas sa makalilisang lunop kaniadto sa kalibotan nga nahitabo sulod sa kap-atan ka mga adlaw ug kagabhion.

Samtang ang New Testament nagasaysay sa pagkahimugso ni Hesukristo sa pasungan sa Betlehem hangtod na sa Iyang kamatayon sa balabag didto sa bukiran sa Kalbaryo liboan na ka mga katuigan ang milabay.

Kun usa ra si Hesukristo ug ang Diyos Amahan, ngano man nga sa paghingutas Niya sa balabag sa udtong utok kaniadtong unang Biyernes Santo misangpit ug nagkanayon man Siya, "Diyos Ko! Diyos Ko! Nganong Gibiyaan Mo Ako!"

Mipadayon Siya, "Amahan Ko, Pasayloa sila kay wala sila masayod sa ilang gibuhat!" ug ang kataposang pulong, "Amahan Ko, Sa Imong Mga Kamot Itugyan Ko Ang Akong Kalag kon Espirito!"

"Misangpit Siya sa Amahan niining mga puntoha entonses maglisod kita sa pagtuo nga usa ra ang Diyos Amahan ug Siya.

Ang Iglesia ni Kristo nagatuo nga managlahi si Hesukristo ug ang Diyos Amahan kay ang nahauna tawo lamang samtang ang naulahi mao ang labing gamhanan og ang nagbuhat sa langit ug yuta kon kalibotan nga gipuy-an sa mga katawhan karon!