EDITORYAL - Loyalty check

Ang balita kagahapon sa buntag nagkanayon nga ang mga mayor ug gobernador sa nasud gipatawag ni Presidente Arroyo alang kuno sa usa ka “loyalty check.”

Si Cebu City Mayor Tomas Osmeña, matud sa balita, wala imbitaha sa Palasyo.

Mga tigpaniid sa lakaw sa mga politikanhong kalihukan hapit magkakorus kon nagkadungan sa pag-ingon nga wa na kinahanglana pa nga paapilon si Tomas sa usa ka loyalty check.

“Ang pagkaloyal ni Tomas ngadto ni GMA nahibaw-an na sa tanan,” matud pa sa usa ka political analyst.

Gani sa usa ka public statement nga iyang giluwatan di pa lang dugay, ang Mayor nag-ingon nga bisan pa sa mga alegasyon nga napuno sa korupsyon ang Malacañang magpabilin gihapon siya nga loyal ngadto ni Pangulong Arroyo tungod kay daghan kining natabang sa Sugbu.