Baton ibaylo sa pistola

Isyuhan og mga baton (tonfa sa mga Chinese) ang kapolisan aron dili na kini magtakin og armas atol sa ilang duty.

Nindot kini nga plano tungod kay malikay na ang mga polis nga makapusil, sama sa mga nanghitabo karong bag-o nga naglambigit og mga bag-ong polis.

Apan aduna kini dili maayong resulta nga maoy angayang bantayan sa kadagkoan sa Philippine National Police.

Ang mga criminal karon, ilabi na ang mga tulisan, kawatan, karnaper ug mga kidnapper mga armado og tag-as nga kalibre sa armas.

Pananglit makasugat ang usa o duha ka polis og armado nga tulisan, unsa man ang iyang buhaton? Posposan lang niya sa iyang baton?

Aw, mabun-og gyud hinuon ang tulisan kun ma-ulo sa baton sa polis. Pero ambot kaha unsay dangatan sa polis kun maigo sa bala sa pistola sa tulisan.

Mao kini ang angay untang hunahunaon sa kadagkoan sa kapolisan aron dili sila mapasanginlan nga namolitika.

Sa mga LRT ug MRT stations sa Metro Manila, dako kaayo og photo cut-out si PNP chief Avelino Razon aron i-promote ang “Mamang Polis” program niini.

Nindot kaayo og “impression” nga gihatag ang hulagway tungod kay desente kaayong tan-awon si Razon sa iyang uniporme, apan dili gani masabtan sa iyang campaign materials unsay buot ipasabot sa Mamang Polis program.

Sa dughan ni Razon ang pin nga kolor puti, samtang adunay lingin nga pula ug nagtadlas sa pulong nga “kotong” nga nagpasabot nga kusog ang kampanya sa kapolisan nga kusog kaayong mangutong.

Bisan unsa na lang ang nahunahunaan sa kadagkoan sa PNP aron ma-promote ang image sa kapolisan.

Apan wala niini hunahunaa ang panultihon “action speaks louder than words” nga sa ato pa, ipakita una ang binuhatan tungod kay mao kini ang labaw kay sa estorya lang.

Dili malilong ang kadaghan sa mga polis nga hilabihan kabadlongon nga wala gyud maapektuhi sa mga programa pagpanindot sa imahen sa PNP. Mao unta kini ang unahon pagtan-aw sa kadagkoan sa PNP, ang pag-ila sa mga badlongon ug ang paghatag nila og programa nga angay kanila aron sila mausab ug mahimong maayong polis.

Ang maayo gani, ibalik kadtong programa sa PNP nga kadtong mga malditong polis ibalhin og destino sa mga lugar nga gubot kaayo, sama sa Jolo ug Basilan.

Apan, bisan unsa pa ang himuon sa kapolisan, kun walay kooperasyon sa mga yanong polis, wala gihapoy kapaingnan.

* * *

SMUGGLING. Sama sa congressional inquiry batok sa smuggling, ikaduha pa gani nga hugna, nakakita na ang mga nag-obserbar niini nga wala gihapon kini kapaingnan tungod sa mga maniobra sa pipila ka mga personalidad.

Nagtuo ko nga bisan unsaon pa sa mga kongresista pagpuga sa duga tungod kay sistema na ang masakiton, wala gihapoy kapaingnan ang mga inquiry sama sa gibuhat karon sa committee on good government sa Ubos Balay Balaoranan.

Mituo ko sa estorya ni Kongresista Antonio Cuenco nga dili na posible ang pagsilot sa masakpan nga sad-an atol sa inquiry, apan ang tuyo na lang niini mao ang pagpanday og mga “remedial measures” aron makorehian ang mga balaod nga gipatuman aron mapakusgan ang kampanya batok sa smuggling.

Kadtong mga nanag-iya og mga sakyanan dili angayang paka-ulawan. Ang maayo nga hatagan na lang sila og panahon nga makakuha sa “amnesty” aron pabayron sa kulang nga buhis sa ilang mga sakyanan nga nasakpan nga “undertax.”

Dili lang ang gobiyerno ang naapektuhan niining maong problemaha, kun dili ang mga lehitimong importer ug mga negosyante nga nadaot ang ilang negosyo ug may pipila ka trabahante ang naapektahan.