Ban private vehicles?

Daghan g’yod sa mga PUJ drivers nga magbiyahean sa Talamban ug silingang mga rota ang miawhag nga ang ipatuman aron pagsulbad sa traffic congestion diha sa Banilad-Talamban highway kun magsugod na ang construction sa flyover mao ang pagdili sa mga private vehicles nga makaagi sa maong dapit atol sa peak hours.

Ang mga drivers misuporta sa baruganan ni Mayor Tomas R. Osmeña nga ang pagpatuman sa “odd-even scheme” aron pagpili sa mga sakyanan nga paagion sa Banilad Talamban highway makahatag lang og dakung bentaha sa mga adunahan, ug apektado ang mga kabus.

Dunay usa ka drayber nga miingon nga modaku ang ilang gasto sa “fuel” kay mahimutang man nga taas na ang rota kun sugdan na pagpahigayon ang “rerouting” sa mga sakyanan samtang mahimo usab nga magkaguliyang ang mga pasahero nga mangita sa ilang kasakyan.

Samtang laing driver ang miingon nga mosamot kagamay ang ilang kitaon tungod kay samtang motaas ang rota nga ilang agian nga posibleng molungtad og subra sa unom ka buwan, walay usbaw ang pletehan sa mga pasahero.

Sagad sa mga passenger jeepney sa pagka karon gigamitan og mga “diesel engines” apan matud sa mga driver nga ang presyo sa krudo mahal na usab kaayo nga   miabot na og subra sa P39 ang litro.

Ang mga driver miingon nga ang gilay-on sa dapit nga ilang agian sobra pa nga makahurot og usa ka litro sa usa ka round trip sa ilang biyahe. Kini nagpasabot nga maalkanse sila og P39 sa matag round trip ticket.

Apan dunay pasahero nga mipasabot sa mga driver nga samtang motaas ang rota nga agian sa mga PUJ nga dili na tugotang makaagi sa Governor Mariano Cuenco Avenue matag adlaw, posible usab nga modaghan ang makasakay sa ilang sakyanan.

Tukma baya ang pagpasabot sa ubang driver. Kun ang pagdili sa mga private vehicles nga makaagi sa Banilad-Talamban highway maoy ipatuman, dili kini himoon sa tanang oras.

Mahimong did-an lang ang mga private vehicles sa pag-agi sa Banilad highway atul sa peak hours – sama sa alas 6 ngadto sa alas 9 sa buntag, dayon alas 11 ngadto sa ala una sa udto, ug alas 4 ngadto sa alas 8 sa gabii.

Gisugyot sa mga driver nga akong nahinabi nga ang mga tag-iya og private vehicles mahimo nga mo-adjust sa ilang oras pinaagi sa pagsayo pag-adto sa dapit nga ilang adtoan kun buot sila nga mosubay sa Banilad-Talamban highway.

Daan na nga si Mayor Osmeña mipasabot nga kun ang “odd-even” gud ang ipatuman, igo ra nga magkatawa ang mga adunahan nga dunay daghang sakyanan nga “odd-even” usab ang plate numbers.

Kini kay mahimo man nga banus-banoson nila paggamit ang ilang sakyanan aron nga mohaum kini sa mga sakyanan nga matugotan sa pagbiyahe sa maong adlaw.

Kun mahinayon nga sugdan g’yod ang odd-even scheme unya sa Pebrero 1, sa mao dayong adlaw ang mga sakyanan nga ang ending sa plate numbers “odd number” nagpasabot nga 1, 3, 5, 7 9 ug 9, dili makaagi nianang adlawa, ug inigka-ugma ang dili makaagi mao na usab ang mga sakyanan nga nag-ending og even numbers ang license plates.

* * *

Atensyon mga sakop sa City Traffic Operations Management (Citom) nga gitugyanan paghimo’g kampanya batok sa mga sakyanan nga magbuga og itom kaayong aso.

Bantayi ug ilista ninyo kining maong plate number. Usa kini ka gamay’ng cargo truck nga dunay plate numbers GJV-761 nga sagad magkarga og mga tangke sa Liquified Petroleum Gas.

Nasundan kini nako sa Gorordo Avenue kagahapon ug kay medyo tungason man og gamay ang Gorordo  Avenue, sus samtang nagsunod ko dili makita ang karsada sa kaitom sa aso. Peligro kini kaayo kay gawas nga makadaut  sa atong environment, makahatag og peligro sa magsunod nga driver kay dili na makita ang karsada.