January 22, 2008 | 12:00am
Sa maka-usa pa gipakita sa mga Sugbuanon ang iyang paghigugma sa kalinaw, kultura ug relihiyosong kalihukan. Natapos ang Sinulog festival ug kapistahan ni Sr. Sto. Niño sa malinawon ug mabulukong paagi. Giisip nga may labing daghang dancing contingent, floats ug higante ang kasaulogan sa Sinulog niadtong adlaw’ ng Domingo apan wala kini makapa-usab sa kainit ug kalingaw sa kinatibuk-ang kasaulogan. Walay puas ang pagsayaw sa mga nagkadaiyang grupo gikan sa Sugbu ug sa bisan asang bahin sa nasud nga tuyong misalmot sa tinuig nga kasaulogan. Sa maka-usa pa, gipakita sa mga Sugbuanon nga bisan ang buhos sa uwan, dili makabalda sa usa ka selebrasyon nga nahimo nang kabahin sa kinabuhi sa mga Sugbuanon.
Kung aduna may nakapalahi sa kasaulogan sa kapistahan sa batang Hesus, kana mao ang paghiusa sa aspeto sa relihiyoso ug cultural nga punto sa kasaulogan. Gipakita sa kapistahan nga dili angayan nga kalimtan ug biyaan ang labing mahinungdanong rason nganong nahimugso ang Sinulog festival. Alang kang Cardinal Vidal angayan nga ipasalamat ang pag-abot sa mga dayo dinhi sa Sugbu labi na sa grupo sa atong mga kaigsuonan sa Mindanao nga bisan kun lahi ang pagtuo ug kultura, apan mihangop sa unsay kultura ug tradisyon sa mga Sugbuanon. Matud sa Cardinal, kinahanglan nga hangpon ug abi-abihon ang partisipante gikan sa maong dapit aron ilang mabati nga ang Sugbu walay gipiling bisita. Ang mahinungdanon lang nga adunay limpyong tinguha ang mga tawo nga modayo sa Sugbu atol sa espesyal nga adlaw.
Gibana-banang miabot sa usa ka milyon ka mga tawo ang nidagsa sa Sugbu atol sa labing gipaabot nga kasaulogan sa nasud. Matag lokal ug langyaw nga turistang nidagsa sa Sugbu, adunay lahi nga tinguha ug panlantaw sa kinatibuk-ang kasaulogan. Apan su’d sa dugay nang panahon, nahimong timailhan ang Sinulog nga mahimo rang mahitabo ang panaghiusa ug pagtinabangay sa katawhan. Wala koy masaway sa kanindot sa kinatibuk-ang presentasyon gikan sa streetdancing hangtud na sa grand presentation sa entablado. Saludo ko sa matang sa kahapsay ug kalinaw nga gipatuman sa otoridad ug sa libuan ka mga mi-boluntaryo aron mamahimong hapsay ang kasaulogan. Bisan pa sa pagbuhos sa uwan, wala kini makababag aron saulogon ang labing gidugok nga festival sa nasud.
Apan luyo sa kasadya ug pagmaya, nakita sa media ug sa katawhan ang pagbeso-beso nilang Mayor Tomas Osmeña ug Gobernador Gwen Garcia. Pagkanindot tan-awon nga luyo sa wala pagsinabtanay sa duha ka dagkong opisyal sa Sugbu, posibleng makalimtan ang panaglalis bisan lang sa maong adlaw aron ipadangat ang pagyukbo sa batang Hesus. Apan dili ba pwedeng ang Sinulog o kapistahan ni Sr. Sto. Niño ang mamahimong da’n alang sa mas hingpit ug malungtaron nga panag-hiusa sa duha ka opisyal? Kung human sa Sinulog makabati gihapon ta og hait nga pagbinayloay og pulong ug akusasyon, wala na siguroy haom nga paghulagway sa duha ka opisyal kundi pagpaka-aron-ingnon ug pagpakita lang sa publiko ang ilang pagka-maayo ug boot sa usa’g usa.
Su’d sa baynte says ka tuig sa Sinulog, adunay mga kausaban ug kalainan sa usa ka dakong kasaulogan. Ug sa mga gipakitang preparasyon ug presentasyon, hugot nga seguridad, walay kinutubang kooperasyon ug wa’ igsapayan nga pagtinabangay, walay duda daghan pang katuigan ang labangon sa tinuig nga kalihukan. Ug sa matag turista nga mobisita sa Sugbu, angayan lang sigurohon nga sa ilang pagbiya sa Sugbu, wala silay laing mabitbit gawas sa maayo ug di’ makalimtan nga kasinatian. Ka usa lang sa matag tuig ang Sinulog apan kung unsa man ang hatud ini sa publiko, siguradong matagamtaman ni sa tibuok tuig. Gihulagway nga gatosan ka milyon ka pesos ang nahimong kita sa mga negosyante sa Sugbu atol mismo sa adlaw sa kasaulogan. Kining tanan, bunga lang sa walay puas nga pagpaningkamot ug kooperasyon sa mga Sugbuanon nga mas pang matagamtaman kung ang mga lokal nga opisyal dili lang magka-uyon ug magka-hiusa sa beso-beso atubangan sa publiko.
