Kay bata pa man

Karong nagka-edaran na ako (29 naman intawon ta!) misantop sa akong hunahuna ang pangindahay nga kun ugaling hatagan pa og kahigayonan pagkanindot nga mobalik sa pagkabata! Kay ngano man? Kini tungod kay ang kinabuhi sa usa ka bata simple, kontento ug walay libog. Dili sama kanatong mga dagko nga simple naman unta ang kinabuhi apan ato pa gyud nga gikomplikado. Ang resulta mao nga daghan kanato ang nagpunay na lang og alburoto daw way kalipay sa kinabuhi. Apan ingon ana man gyud ang kinabuhi dili ba?

Ang Santo Niño hulagway sa mapaubsanong pag-ambit sa atong Ginoo diha sa atong pagkatawhanon. Ang iyang pakigtipon nagmatuod sa iyang dakong gugma kanato. Siya usa man unta ka hari apan ang iyang kabantog ug gahom iyang gipunting diha sa mapaubsanong pagpangalagad ug gani gigamit pa niya ang hulagway sa usa ka bata. Aron kinsa kadtong buot mahimong labaw ang kinahanglang moawat sa kinaiya sa usa ka bata.

Apan ang Ginoo wala magpabilin sa dagway sa usa ka bata. Mitubo siya ug mihamtong ug gani, nahiagom siya sa mapintas nga mga panlutos sa mga kadagkoan sa iyang panahon nga miisip kaniya nga usa ka hulga sa katilingbanong seguridad. Kini tungod kay dili naman siya ang Niño nga mahimong ulog-ulogan o dili ba kaha lingaw-lingawon sa mga panaad sa ubang mga deboto nga magbag-o apan mobalik gihapon diay sa naandang binuhatang hiwi.

Sa atong pagsaulog ning mahinungdanong pangilin sa atong Ginoo nga mao ang Santo Niño, ato kunong usisahon kun nakaawat ba kita sa iyang mga hiyas nga mapaubsanon. Ug alang kanako mas konkretong sanong sa mensahe sa maong pagsaulog, gihatagan ba kaha nato og igong pagtagad ang atong mga kabataan karon? Pastilan! Pagkawalay pulos kun magpunay lang og anak unya ang mipalugwa ning mga bataa ang walay igong kaisog sa pagtuman sa ilang responsibilidad.