Og giowan og bato si Bai Polis

Ambot og madala pa ba kaha ni bai polis nga nagkalo og kalo ni Santa Claus ug nagdala og bag sa candy ang mga molupyo sa barangay Tejero ug Pasil? Di ba lang kaha bugal-bugalan ug pikatan lang ang dala ni bai polis nga mga candy kun ugaling mosuroy sila sa maong lugar? Gidumog ug giowan man ugod og bato si bai polis kaniadtong Sabado ug Domingo samtang ilang gidakop ang suspect sa pagpayuhot og ginadiling drugas sa nahisgutang mga lugar. Gumikan sa maong hitabo nasamdan si bai polis ug pulos nakasibat gikan sa iyang mga kamot ang mga suspect sa pagpayuhot og ginadiling drugas ug gidala pa niini ang posas. Ang gipakitang taras sa mga molupyo sa barangay Tejero ug Pasil atol sa gipahigayong pagpangronda sinyalis na kini sa nagkalig-ong suporta nga nadawat sa mga nagpayuhot og ginadiling drugas gikan sa ilang mga silingan. Robenhood man ugod kining mga nagpayuhot og ginadiling drugas alang sa ilang mga silingan. Sila ang dangpanan sa mga panahon sa ilang kalisdanan ilabi na sa emerhensiya. Kini ang hinungdan kun nganong atoa na hinuon modapig sa mga tigpayuhotan og ginadiling drugas ang ilang mga silingan bisan pa man kun nasayod sila nga ang negosyo niini ginadili. Ning bag-ong programa nga gipasiugdahan karon sa atong kapulisan dinhi nato masukod kun magsilbi ba ang kalo ni Santa Claus nga gisol-ob ni bai polis ug ang bag sa candy nga gidala niini sa pagbawi sa suporta sa kampanya batok sa ginadiling drugas nga gilangkat sa mga tigpayuhotan og ginadiling drugas gikan kanila. Kinsa kahay modaug sa away ni bai polis ug robenhood.

* * *

Wa magpalupig ang grupong tau  gama sa Akrho kini kun atong tuohan ang pamahayag sa kapulisan didto sa siyudad sa Danao. Pila ka gabii na ang nakalabay upat ang nalandig sa tambalan human kini pamosila sa way igong hinungdan didto sa Danao. Lain kining kaso sa drive-by-shooting. Sigon sa imbestigasyon sa kapulisan sa nahisgutang dakbayan maoy migawas nga ilang nasuspetsahan ang grupong Tau Gama. Kun tinuod kining giingon sa police sa Danao, makaingon ta nga wa gyud diay magpalupig niining duha ka grupo kay samtang ang responsable sa drive-by-shooting dinhi sa Sugbu mao ang Akrho, iya usab sa Tau Gama ang Danao. Si kinsa kaha no ang moangkon sa drive-by-shooting sa Mandaue ug Lapulapu kun aduna man kini? Di ba pod kaha ni angkunon sa Bloods ug Crips? AMBOT LANG!