Pan de sal tag dos pesos na!

 Matag ingon nila nga milambo na ang ekonomiya sa nasud, magdungan dayon pag-anunsiyo ang mga gas company pagpa-usbaw sa presyo sa ilang produkto: gasolina, kerosene, LPG, ug ubang mga oil products.

Alang kanamong Pedro nga lapsaw kaayog utok, maglisud mig sabot kun unsay buot ipasabot sa kanunay nilang gipasibantug nga paglambo sa ekonomiya sa nasud. Hayahay na kono ang atong nasud, kay milambo na ang ekonomiya.

Sa ato pa, kaylagi, misulbong na ang ekonomiya., unta misulbong usab ang kahimtang ug mga  pagpuyo sa katawhan.Ikaw, Dro, komusta ka man? Hayahay ka na?

 Wala na bay Pinoy nga nagmug-ot, wala nay nagpunay og pugong sa tiyan gumikan sa kagutom, wala nay ganahan mogawas sa nasud kay mabuhi na sila dinhi, wala nay importasyon sa bugas ug asukar, kay daghan na tag abot dinhi?

Mao na ba kini karon ang atong kahimtang, nunot sa paglambo na sa ekonomiya? Ikaw, Dro, komusta ka man? Nakakita na kag trabaho? Pila may sweldo? Nakapadayon bag tungha ang pito nimong mga anak? Wa na ka magsalig sa scavenging sa imong mga anak?

Unya, imo nang nasungkipan ang nagtulo ninyong atop? The last time nakong duaw sa inyo, karton ray imong gisungkip, gani, karton say imong gihulip-hulip sa bungbong, ug mao say gihimo ninyong banig.

Milambo na konog maayo ang ekonomiya. Nakaabot ug naka-benefit ba kini kanimo ug sa imong banay? Diin ra man kutob ang epekto sa economic recovery? Diha ra ba sangko sa mga cabinet member, sa kongreso, sa mga gobernador ug mga mayor? Ikaw, Dro, naabtan ka ba sa paglambo sa ekonomiya?

Kun wala, diin ra ba kutob? Kinsa ra man ang nakapahimulos niini? Sila ra? Mao ba ni ang hinungdan nga dinhi sa ato, atong gipalitan og bag-ong mga sakyanan ang atong mga sakop sa provincial board? Ingon ba niini ka daghan sa atong kwarta? Ug samtang brand-new gyud nga sakyanan ang imong gipagamit sa imong board member, ikaw, unsa man?

Yes, matag ingon nila nga milambo na ang ekonomiya, mosakit ang akong dughan tungod kay sila rang kadagkuan sa gobiyerno ang klaro nga nahamugaway, samtang kita dinhi, nagkaut-ot ang kabutang.

Ug lakip sa akong ma-dalidalig palit, ang pan de sal nga tag-mameso ra unta, karon, tag dos pesos na. Economic recovery anyone?