Hinanggaw nga yawyaw ni Trillanes

Abtik kaayong nakapunting sa iyang tudlo si Senador Antonio Trillanes ngadto kang Armed Forces Chief of Staff Hermogenes Esperon ug National Security Adviser Norberto Gonzales isip mao kunoy nagpaluyo sa pag-ulbo sa Glorietta Mall sa dakbayan sa Makati dili pa lamang dugay.

Kini bisan pa man kun wala siya'y igong ebidensiya nga nagpamatuod nga ang maong pag-ulbo naggumikan sa usa ka bomba. Ug bisan pa man sa pasiunang deklarasyon sa otoridad nga ang maong hitabo mugna sa depektosong ventilation system sa maong mall.

Sa iyang mga pasangil, nagkinahanglan si Trillanes og konkretong ebidensiya pagsuporta sa iyang mga alegasyon nga sila si Esperon ug Gonzales maoy nagpasiugda sa maong pag-ulbo. Kay kun wala siya'y igong ebidensiya, mora na hinuon og guba’ng plaka kining bagitong senador nga pataka lamang og yaw-yaw og pulos hinanggaw aron lamang tagdon sa medya.

Hinuon matud pa ni Trillanes nga aduna kuno siyay tawo nga nagpamatuod nga si Gonzalez maoy utok sa pag-ulbo sa Glorietta Mall. Apan hangtod karon wala pa gihapon mipatim-aw ang iyang giingong kasaligan nga tinubdan. Daghan na hinuon ang nagduda nga pasiatab lamang kining tanan ni Trillanes aron lamang makuha ang atensiyon sa medya.    

 Insakto lamang ang gibuhat ni Senador Gregorio Honasan pagpahilum kang Trillanes sa iyang mga alegasyon nga maniubra sa administrasyon ang pag-ulbo sa Glorietta Mall. Ang pamahayag ni Trillanes, ni Honasan pa, espekulasyon lamang nga adunay sagol nga pamolitika.

Matud ni Honasan mas maayong mohilom na lamang si Trillanes kun wala siya'y igong basihan. Kay usa kuno ka “counterproductive” kun magsige lang og alegar si Trillanes ni bisan kinsa kun walay siyay klarong ebidensiya.

Bitaw. Kini tungod kay lisod usab tuohan ang mga pasiatab ni Trillanes batok sa administrasyon. Kugi lamang siya og tagawtaw sa iyang mga alegasyon batok kang Esperon ug Gonzalez apan wala siyay gipakita bisan usa ka ebidensiya nga nagpunting sa duha nga maoy responsabli sa pag-ulbo sa Glorietta Mall.

Hinuon, dili lamang kini nga higayon nga modayon lamang og ambak si Trillanes ngadto sa mga isyu bisan pa man kun wala  siyay igong ebidensiya. Sa nakalabay’ng eleksiyon, iya usab nga gibirahan si Senador Miguel Zubiri nga midaug lamang kuno gumikan sa pagpanglimbong.

Gani, sa iyang pasangil kang Zubiri, nagkanayon pa si Trillanes nga dili siya gustong ikauban si Zubiri, kinsa iyang gihinganlan nga “cheat,” sa hawanan sa Senado. Maayo na lamang kay nakapugong pa si Zubiri ug wala niya tinud-a ang iyang bahad pagdemanda kang Trillanes.

Sa yama-yama ni Trillanes nga walay igong basihan, mora og nagdala lamang hinuon siya og disgrasya ngadto sa Senado. Iya na hinuon nga gipun-an ang nagkagusbat nang imahe sa Senado gumikan sa pagkawalay maayong serbisyo niini ngadto sa katawhang Pilipinhon gawas lamang sa walay pulos ug kapaingnan nga mga imbestigasyon.

Apan angay’ng hunahunaon ni Trillanes nga kun si kinsa tali kaniya ug sa administrasyon ang adunay tendency nga modangop pagsabwag og kagubot, walay dakong pagduda nga siya. Kini ato nang napamatud-an pinaagi sa iyang gibuhat upat na ka tuig ang nakalabay.

Dili ba natay-og ang nasud sa dihang si Trillanes ug pipila niya ka mga alipures mitangka paglusad og kudeta batok sa kagamhanan usa niana ka buntag didto sa Oakwood sa Makati City niadtong 2003? Dili ba ubay-ubay ka mga eksplosibo ang gitanom sa grupo ni Trillanes palibot sa Oakwood ang na-recover sa otoridad human sa ilang tangkang kudeta?

Kun nangbuto pa kadtong maong mga eksplosibo, unsa kahay hitsura sa sentro sa panalapi sa nasud taliwala sa internasyonal nga komunidad gumikan sa walay pulos nga tangkang kudeta ni Trillanes ug iyang grupo nga nagpatuong mga manluluwas sa mga sundalong kulang sa pagtagad sa kagamhanan.

O midaug si Trillanes gumikan sa mga boto gikan niadtong mga kulang sa paminsar kung angay ba siyang ibutang sa hawanan sa Senado. Ug wala kini nagkahulogan nga gamhanan na siyang motagawtaw sa mga isyu bisan kun wala siyay kalibotan.         

* * *

Ipadala inyong reaksyion sa [email protected]