Mauwaw baya ta

Wala na g’yoy purohan nga mauktaba pa ang pagpahigayon sa barangay eleksyon nga gitakda na karong Oktubre 29.

Ikaduha, kun hukman sa mga senador nga ipauktaba ang pagpahigayon sa barangay eleksyon, ilang maani ang kasuko sa katawhan – ilabi na sa mga kandidato nga dagko na kaayo og gasto alang sa ilang kandidatura.

Sayod ko nga ang katawhan dugay ra nga naglungot-lungot nga duna g’yoy eleksyon kay dunay ilang mga opisyal sa tagsa-tagsa nila ka barangay nga buot nila nga hulipan.

Nabalaka lang ko nga basin og mosipyat lang gihapon ang mga botante niining panahona kay mabutaan sila tungod sa kwarta nga ihatag kanila sa mga mapahimuslanong kandidato.

Daghan g’yod kaayo karong mga kandidato ang buot magpapili sa barangay eleksyon. Gitug-anan ko sa akong amigo nga taga barangay Day-as nga pito ang modagan pagka kapitan sa ilang lugar.

Sila dunay ilang tagsa-tagsa ka grupo, tag pito ka kandidato pagka konsehal. Basta kay moabot lagi kuno og mga 90 ang magpapili sa Day-as lang. Grabeha no?

Sa ubang barangay kaha no? Didto hinoon sa among barangay sa Lorega-San Miguel, daghan usab ang modagan. Paminaw nako moabot og mga 50 ang magpapili alang ra sa walo ka pwesto.

Tambagan nako ang mga botante nga ayaw na g’yod tawon ninyo pilia ang mga opisyal nga buot pagpapili pag-usab nga walay pagtagad sa inyong problema sa nangaging katuigan.

Unya karon, abi kay hapit na man ang eleksyon, misugod na sila pagpakita diha sa inyong mga lugar? Kahilas g’yod tawon. Dihang layo pa kaayo ang eleksyon, bisan ang anino na lang sa maong mga opisyal wala makit-i sa among dapit.

Nasayod ko nga kining maong matang sa mga opisyal, duna usab diha sa inyong mga dapit. Ayaw kamo pagpatintal sa ihatag kaninyo nga P200 o kaha P300 kay tibuok tulo ka tuig – mahimo pa gani nga subra pa – nga kamo mag-antos.

Diri sa among barangay, nakadungog ko nga dunay mga kandidato nga nag-andam na og dakung kantidad aron ipamayad sa mga botante. Walay kausaban ang atong lugar kun magpadala kamo sa kwarta.

Kining maong mensahe, ipadangat ko usab sa mga botante diha sa lainlaing barangay nga siguradong tanyagan og kwarta sa mga kandidato.

* * *

Nindot kaayo ang sugyot nila ni Konsehal Rodrigo Abellanosa ug Arsenio Pacana nga pabutangan og mga electronics surveillance gadgets ang mga karsada dinhi sa dakbayan.

Ang ilang tumong mao nga makatabang ang mga surveillance gadgets sa pagsulbad sa mga krimen kay makita man pinaagi niini ang dagway o kaha bayhon sa mga tawo.

Apan ang unang problema mao kini. Dili kaha pangawaton lang ang mga gagmay’ng camera nga ibutang sa lainlaing dapit? Ikaduha, kun ako’y maghimo og krimen – kay nasayod man ko nga dunay mga camera – magtaptap kos nawong paghimo sa krimen.

Ikatulo nga problema, walay budget ang Camp Crame sa pagpamalit sa maong mga kahimanan nga alang ra sa dakbayan sa Sugbu.

* * *

Nganong wala pa man makalihok ang kadagkoan sa dakbayan sa pagpangguba sa kabalayan nga gitukod daplin sa kasapaan?

Ayaw mo’g hadlok-hadlok. Matud pa bitaw ni Acting Mayor Mike Rama nga kining maong mga pamilya nasayod nang daan nga moabot ra g’yod ang panahon nga sila papahawaon sa ilang gipuy-an.