Pagsaludo sa kauban sa buhat

Dos sientos oras ang gihatag  kanako sa University of San Jose-Recoletos aron maka-intern sa ABS-CBN sa karaang buhatan ini sa Leon Kilat sa dakbayan sa Sugbu. Wala koy laing bawon atol sa akong mga unang adlaw sa labing tinahod ug dako nga news organization sa nasud kundi ang determinasyon ug interes nga makat-on sa mga butang nga gikinahanglan aron mamahimong usa ka hingpit nga magsisibya. Salamat sa akong inahan nga maoy nag-aghat nako nga ipadayon ang akong damgo, nakabansay-bansay ko sa ABS-CBN. Wala nako damha nga ang pagtukmod sa akong inahan nga maminaw sa away sa among mga silingan aron makuha ang detalye ug akong mahatod kaniya ang hinungdan sa lalis, maoy mobukas sa akong interes sa pagsulod sa usa ka trabaho nga ubos ang pagtan-aw sa uban apan gidayeg sa kadaghanan.

Dili nako makalimtan nga sa unang adlaw palang sa akong internship, si Ramil Paican na ang nag-atiman kanako. Iya kong gilibot sa karaang studio ug gipa-ila-ila sa halos tanang trabahante, ma-reporter man o janitor sa istasyon, ang tanan kaila ug suod ni Ramil Paican. Nakugang nalang ko nga human sa usa ka semana sa istasyon, gibutang ko sa Hoy Gising ug gipakutlo og balita uban ang cameraman. Sa matag balik nako sa istasyon bitbit ang detalye nga akong nakutlo, si Ramil Paican ang kanunay nga moatiman nako pagpahimutang sa akong news item.

Gikan sa hustong anggulo ug tukma nga mga pulong alang sa usa ka news item, ang tanan gitudlo kanako ni Ramil nga puno sa pasensya ug interes nga makatabang sa usa ka estudyanteng nag-ambisyong mamahimong sama niya.

Dili ko hanas sa pagsuwat og bisaya ug labaw nang magsapid-sapid ang akong dila kung imo kong pabasahon og balitang binisaya. Apan luyo sa akong kahuyang, si Ramil Paican ang may labing taas nga pasensya sa pagtudlo nako. Tungod sa tabang ni Ramil nahatagan ko og higayon nga makatrabaho sa ABS-CBN.

Ug samtang nagtubo ug nagpadayon ko sa pagdawat sa akong bag-ong mga hagit sa panibya matag adlaw, walay higayon nga nibiya nako si Paican, ang akong giisip nga amahan sa akong trabaho. Sa dihang niabot ang panahon nga may mga tanyag nga mobalhin ko sa kaulohan, si Ramil ang naghatag nako og hingpit nga hulagway sa unsay akong mamahimong kinabuhi didto sa kaulohan ug kung unsa pay akong pwedeng matabang ug mahimo kung magpabilin ko sa Sugbu.

Sa mga dagkong desisyon sa akong kinabuhi sa panibya, adunay Ramil Paican nga nitabang ug naminaw sa akong mga kahi-ubos ug nakigduyog sa akong ginagmay nga kalampusan.

Layo na ang naabtan sa kontrobersyal nga insidenteng nahitabo niadtong kadlawon sa Septiyembre 18 sa may highway sa dakbayan sa Mandaue. Gikan sa insidente sa pagkabangga sa crewcab sa ABS-CBN hangtud sa nahitabong kagubot tali sa kampo sa pulis ug sa news crew, nagkalawom ang resulta sa imbestigasyon nga niresulta sa sakit nga desisyon batok sa duha ka habig.

Nagsanga-sanga ang isyu nga mismo ako wala masayod nganong niabot sa ingon ining punto ang usa ka insidente sa sakyanan. Ang mas klaro lang karon, adunay mga pamilyang naapektuhan ug adunay mga higala nga nasubo gumikan sa usa ka hinubog nga insidente.

Adunay nagkadaiyang dalan kung nganong nakasulod sa trabaho sa media ang usa ka magsisibya. Ug kaming tanan nga ani-a na karon sa maong matang sa trabaho ug kadtong mga tawo nga unang nibiya namo adunay tagsa-tagsa ka dalan sa pagpanamilit ning buhat nga gihatag kanamo sa kahitas-an. Apan usahay adunay mga pagbiya nga sakit ug lisud dawaton.

Ang pagpanamilit ni Paican sa ABS-CBN usa ka dakong kawad-on dili lang nako nga nitamod ug nirespeto sa iyang pagkatawo apan sa kinatibuk-ang organisasyon. Isip news desk nga maoy tig-hatag namo og assignment ug tighan-ay sa among mga balita, si Paican ang nahimong usa   ka lig-ong haligi sa organisasyon.

Lisud man dawaton ang nahimong desisyon sa management, apan gikinahanglan nga dawaton. Siguro dili pa karon, apan ugma damlag siguradong motumaw ra ang tinud-anay nga hinungdan nganong kinahanglang mahitabo ang tanan. Alang kang Ramil Paican nga nisaludo nako dihang nahimo kung kabahin sa pamilya sa Banat News, saludo ko sa imong pagkatawo. Bisan sa pagsuway ug bag-ong hagit nga niabot kanimo karon, sigurado kong adunay nagpaabot nga maayong ugma alang nimo ug sa imong pamilya tungod kay walay makaduot sa ngitngit sa usa ka maayong tawo.