Kinsay bakakon?

Miduso og reklamo atubangan sa ABS-CBN management ang polis nga si Sr. Insp. Jose Liddawa Jr. batok sa reporter ug cameraman nga luwan sa sakyanan nga iyang gidasmagan niadtong Lunes sa miaging semana.

Kasong dishonesty maoy gisang-at ni Liddawa batok nilang Ramil Paican ug Joel Noel ug sa driver nga si Samuel Trangia lakip na sa duha pa nila ka wa mailhing kauban. Si Liddawa mireklamo nga di kuno makiangayon ang footage nga gipakita sa telebisyon.

Matud ni Liddawa nga namakak sila si Paican tungod kay gipagawas niini nga siya maoy nanguna sa pagpangulata. Siguro dunay punto si Liddawa niini, apan ang iyang pag-una-una og pasaka’g reklamo, alang nako, nagpakita sa iyang pagka way uwaw.

Kun wa man ireport sa ABS-CBN ang tinuod, dili si Liddawa maoy argabyado kun di ang publiko. Katungdanan sa TV network ang pag-report sa tinuod, kun wa ni nilag himoa, dako sila’g tulobagon sa mga tawo ug dili ngadto ni Liddawa.

Sa unang bahin, siya maoy nagsugod sa kontrobersiya ug siya maoy dunay dakong tulobagon sa katawhan ug sa ABS-CBN tungod sa nadaot nga sakyanan nga iyang gidasmagan.

Si Liddawa maoy nibangga sa sakyanan sa ABS-CBN tungod sa iyang ka hubog nga nagmaneho sa iyang sakyanan. Unya bisan sa iyang gihimo, siya pa maoy dunay nawong nga  nag-una una pagpasaka og reklamo.

Si Liddawa sa iyang affidavit mipasangil nga namakak ang reporter ug cameraman sa iyang pangangkon nga siya maoy unang nangulata ug pagkahuman na-umod hinungdan nga nakuyapan.

Matud niya nga ang tinuod nga nahitabo mao nga siya maoy giunahan og sukmag ni Noel hinungdan nga mikuha unta siya sa iyang armas  sud sa iyang sakyanan apan wa niya kini makit-i hinungdan nga mibalik siya og gawas ug misukmag ngadto ni Noel aron sa pagpanimawos dungan ang pagpa-ila nga siya usa ka polis.   

Kinsa kahay bakakon tali nilang Liddawa ug sa grupo ni Paican? Dili kaha si Liddawa maoy namakak? Abi ko ba og matud ni Liddawa nga wan a siya’y nahinumduman sa nahitabo tungod kay labihan niyang huboga.

Sa una niyang mga interviews matud niya nga ang iya ra gyung mahinumduman mao ang pagbangga sa iyang sakyanan. Human niini wa na siya mahinumdum sa sunod nga nahitabo. Kun mao ni, nganong kalit man lang siya rong nahinumdom nga si Noel maoy unang nanukmag niya sa dihang nanaog siya sa sakyanan?

Ang maayong gibuhat ni Liddawa mao ang pagpakahilom nalang ug pagpangayo og pasaylo sa iyang gihimo inay nga siya pa hinuon maoy mag-una una og kiha.

* * *

E-mail:   [email protected]