Pagsiak sa paghiusa

Gisuspenso na ni Presidente Gloria Macapagal Arroyo ang pagpatuman sa National Broadband Network Project nga kontrata gumikan sa mga kontrobersiya nga naglimin niini. Una, giingon nga ang orihinal nga prisyo sa maong kontrata 130 milyones dolyares lamang apan mikalit lamang kini sa pagsaka ngadto na sa 329 milyones dolyares. Ikaduha, ang paglaktod sa proseso nga agian sa maong kontrata tungod sa gamhanang kamot  nga nagpaluyo niini.

Si Joey de Venecia III anak ni Speaker Jose de Venecia mitumbok ngadto ni First Gentleman Mike Arroyo nga mikantalita kaniya sa pagpasibog sa pag-apil sa bidding sa maong proyekto aron makuha kini sa ZTE Corporation nga usa ka Chinese Corporation. Ang maong pasangil nakapasuko sa mga anak sa Presidente ug sa iyang mga kaalyado. Samtang midepensa usab si Speaker Jose de Venecia sa anak niini.

Ang National Broadband Network Project mao kaha kini ang magsiak sa taud-taud nang panaghiusa sa mga Arroyo ug de Venecia?

Human gibulgar ni Joey de Venecia III ang pag-apil-apil ni FG Mike Arroyo sa NBN nga kontrata gipakigtagboan dayon sa mga anak sa unang pamilya ang mga kongresista nga ilang kaalyado ug didto gisugyot dayon sa ilang mga dumadapig ang pag-ilis ni Speaker Jose de Venecia.

Apan kining maong sugyot kinahanglan tun-an pagmaayo ug dili dali-dalion tungod kay aduna usay alas nga gihuptan ang Speaker sa ubos balay balauranan.

Kun may alas nga gihuptan si Presidente Gloria Macapagal Arroyo alang kang Joe de Venecia aduna  usay alas nga gihuptan si Speaker Jose de Venecia alang sa Presidente. Kung mapailisan sa Presidente si Jose de Venecia isip Speaker of the House, mapaimpeach usab ni de Venecia ug sa iyang partido ang Presidente pinaagi sa pagpakig-alayon sa iyang partido ngadto sa opposition nga dugay rang nagpaabot sa tukmang higayon.

Mobiya na isip director sa kapulisan sa tunga-tungang Kabisay-an si Chief Superintendent Silverio Alarcio Jr. karong umaabot Septembre 28, 2007. Apan sa iyang pagbiya mohulip usab kaniya ang panagbangi na usab sa duha ka tag-as nga opisyal dinhi sa Sugbu, dili na tungod sa yuta kun dili tungod kun si kinsa ang mopuli kang Chief Superintendent Silverio Alarcio Jr.

Si Mayor Tomas Osmeña mirekomendar kang Chief Superintendent Ireneo Bacolod samtang si Gobernador Gwendolyn Garcia mirekomendar ni Chief Superintendent Ronald Roderos.Ang duha pulos gusto nga ang ilang palingkoron isip hepe sa kapulisan dinhi sa Central Visayas mao gayod ang ilang pinili.

Awhag nako ngadto sa Senior Officers Placement and Promotion Board, para way gubot, ibasi ninyo ang pagpili, pinaagi sa agi o track record ug ayaw sa agi sa nagsulat sa rekomendasyon niini.