Political will

Kinahanglang ang mga opisyal mopakita gayod og “political will” pinaagi sa pagpangguba sa mga straktora nga anaa gitukod daplin sa kasapaan nga nakabara sa dagan sa tubig paingon sa dagat.

Kon kuwang kamo og kaisog kay mahadlok nga ang maong mga tag-iya sa panimalay dili na mobotar kaninyo sa eleksyon, mga opisyal kamo nga walay pulos.

Sama karon nga nagsingabot ang barangay eleksyon, ipakita nga angayan ka nga mahimong lider, nga duna kay political will. Ang akong hagiton niini mao kadtong mga kapitan nga dunay sapa ang ilang barangay.

Apil niini mao ang barangay San Roque, T. Padilla, Lorega-San Miguel, Zapatera, Ermita, Tinago, Tejero, Guadalupe, Sapangdaku, Sambag II, Pasil, Mambaling, Mabolo, Caretta ug daghan pa.

Sa nasaksihan nako nga footages sa lainlaing kasapaan dinhi sa dakbayan, akong nakita nga mao diay nga mosugwak g’yod ang tubig kun may uwan kay ang daplin sa kasapaan daghan kaayong miturok nga panimalay.

Ang grabe g’yod kay ang dapit nga maoy gawasanan na sa tubig duol na sa dagat, migamay pag-ayo kay daghan nang kabalayan nga gitukod. Kini maoy angay’ng panggub-on sa walay kukahadlok.

Dili sila angay’ng anha magbalay diha. Kun mangutana mo og asa kamo magbalay? Pangita.

Ako gani wala may kaugalingong balay. Ang tinuod kun gusto pa ko nga motukod og balay diha sa mga dapit nga gipuy-an karon sa squatters, nakabalay na ko, apan mauwaw ko.

Mao nga hangtud karon nagpangita tawon ko bisan gamay na lang kaayong luna nga kabalayan, apan dili usab nako isakripisyo ang ubang tawo nga malunopan na lang tawon kay naa kamo diha sa sapa.

* * *

Ang mga kawani sa sibyaanan DYLA magsaulog karong Huwebes sa iyang ika-40 ka tuig nga sumad sa iyang pagkamugna kaniadtong 1967.

Daku nakong garbo nga nahimo ko nga tipik ug kabahin sa DYLA karong panahona kay dili ikalimod nga girespitahan ang maong sibyaanan bisan sa kaubanan namong mga sakop sa media.

Tandia diha sa mga mantalaan kun kinsa ang kanunay nga makutloan og mga balita. Dili pagpanghambog, walay makalupig sa DYLA.

Daku hinoon kaayo og natampo niini sila si News Director Jhunnex Napallacan ug Program Director Jun Tagalog, ug kaming mga reporters maoy ilang mga support group.

Bisan ako, midayeg sa hilom sa DYLA tungod kay dili kini sama sa ubang mga sibyaanan nga manghatag og bugas, sardinas, baktin ug unsa pa diha nga aron lang pagkabig og mga tigpaminaw.

Ang amo sa DYLA mao ra g’yod ang paghatag og mga lab-as nga kasayuran alang sa katawhan, ilabi na sa mga mamumuo nga maoy tinuod nga tag-iya sa sibyaanan.

Sila si abogado Democrito Mendoza, Januario Seno ug Cecilio Seno maoy unang mga lider nga mimugna sa DYLA pinaagi sa tampo sa mga mamumuo nga sakop sa Associated Labor Unions.

Ang unang mga sakop sa ALU kaniadto nagtampo-tampo og tag P20 sa ilang sweldo aron nga madugang sa gikinahanglang kantidad nga magamit pagpalit og kahimanan alang sa radyo.

Tuod man, tuig 1967 nabati sa kahanginan sa unang higayon ang tingog sa DYLA ug hangtud karon padayong nagserbisyo sa katawhan sa walay pagpinig nga mga balita.

Tiaw mo, bisan og ang kanhi manager sa DYLA nga bana sa among manager, si Director General Cerge M. Remonde, anaa pa sa Malacanang apan si Presidente Arroyo dili gihapon makalikay sa kumentaryo kun maglambigit kini’g isyu.

Long live DYLA!