Lalis sa tulis

Giawhag ni Gobernador Gwen Garcia si Mayor Tomas Osmeña sa pag-angkon og responsibilidad sa kapakyas pagbadlong sa mga tulisan sa La Nueva Supermart. Apan hangtod, kapin na sa tulo ka buwan human sa bangis nga krimen, wa pa siya moangkon og responsibilidad sa kapakyas pagpugong sa mamumuno ni anhing Mayor Rogelio Ilustrisimo Sr. sa iyang kaugalingong tugkaran sa Kapitolyo.

Tinuod nga dakong sagpa sa pamunoan ni Osmeña, ug sa gipasigarbo nga katakos sa kapolisan batok sa kriminalidad, ang pagkahitabo sa tulis pipila lang ka metro gikan sa iyang buhatan sa City Hall. Apan di sang kaikyas sa tulisok si Garcia sa pagbanaw sa dugo sa compound nga iyang gibukotan sa labing higpit nga kahimanan sa seguridad.

Gawas kon simbako, layo ra to, moinsistir si Garcia nga ang tanang mahitabo sa iyang tugkaran responsibilidad sab ni Osmeña.

* * *

Ang yanong mga tigpaniid, apil na ming mga sakop sa media, nitumbok sa kapaspas sa kapolisan nga nakapusil sa duha ka guwardiya, nakasakmit sa kuwarta, nakaikyas ug nakatago gikan sa kapolisan maoy mga tilimad-on nga pulos hinog sa kasinatian ang mga tulisan nga gidudahang mga sakop sa Bohol robbery group.

Apan si CCPO Chief Patrocinio Comendador lahi ang nakita. Gipasabot niya ang DYAB Abante Bisaya nga ang pagpusil sa duha ka guwardiya wa kinahanglana. Kay mahimo ra man nilang kuhaon ang kuwarta pinaagi sa pagtion ug pagdis-armar sa mga guwardiya. Matod ni Comendador hilaw ug batan-on ang mga tulisan ug nakatilaw lang og taphaw nga bansay-bansay sa mga armas ug ubang kahimanan nga napalit sa kuwartang natigom sa nangagi nilang mga tulis sa mga lalawigan sa Bohol ug Sugbo.

Nanghinaot si Comendador nga ang naghinobra nilang ka-agresibo mahimong mosangpot sa kasaypanan nga mohatod nila sa mga kamot sa kapolisan.

* * *

Si Lapu-Lapu City Police Chief Louie Oppus nakakuha sa kasayuran sa plano sa mga tulisan ug sa mapa sa ilang mga target. Naapil sa mapa ang La Nueva ug ubang dagkong mga bay patigayon sa downtown area. Niinsistir si Comendador nga ila dayong gi-aksiyonan ang kasayuran ni Oppus apan nasipyat sila: Ang bay patigayon nga ilang gidudahang maoy sunod nga target nakaplagan nga wa diay magtipig og dakong kuwarta.

Pinasikad sa mga dokumento nga iyang nahipos, si Oppus kumbinsido nga ang bag-ong pundok sa mga tulisan sa Sugbo gipangulohan sa mga sakop o suhito sa ininglesan sa militar ug kapolisan. Apan si Comendador niingon nga kanhi sakop sa CAFGU ray ilang nailhan nga naggiya sa pundok.

Managlahi sang ilang basa sa gigikanan sa bag-ong pundok. Si Oppus nahadlok nga nagtinabangay nang nagkatibuwaag nga mga sakop sa nagkalainlaing pundok sa mga tulisan.

Apan si Comendador nagkanayon nga di mahitabong makigkonsabo ang mga sakop ni Rey Torres sa bag-ong nisubol nga mga Bol-anon.

* * *

Email:[email protected]