EDITORYAL - Laing kadungganan

Ang pagpangharos sa mga Pilipinhong boksingero batok sa mga Mexikano sa World Cup didto sa Amerika niadtong Domingo (RP time) usa ka kalampusan nga angay’ng ikalipay ug ipasigarbo natong tanan.

Ang Pilipinas mipukan sa Mexico sa iskor nga 5-l atol sa maong World Cup  diin gipakita sa mga Pinoy nga boksidor ang ilang pagdominar sa mga Mexikano nilang kaatbang.

 Impresibo ang maong kadaugan sa mga boksingerong Pinoy. Gani suma pa sa pipila ka mga tigpaniid sa natad sa pamoksing tabla ra kini sa mga kadaugan nga naangkon ni Manny Pacquiao tungod kay ang nasud nga Pilipinhon man, ug dili ang kaugalingon nilang interes, ang ilang gipakigtigian tali sa Mexico.

Among itunol ang among mainitong pahalipay ngadto sa milangkob sa Team Philippines ug kami manghinaut nga magpadayon ang ilang kadaugan sa umaabot nga mga adlaw.