Kinsa may naghatag og permit nga magamit na ang ACT?

Pinasikad sa namantala nga mga reklamo sa mga estudyante nga sige silag hingos sa abog ug sa baho sa pintal ug varnish sa wa pa mahuman nga building sa Asian College of Technology, atong masabut nga di pa gyud ni angayan gamiton. Apan, kinsay naghatag sa permit nga mahimo nang gamiton?

Sumala gihapon sa namantala, dugang kakulangan ug mga suliran naglangkob ning mosunod:

1. Wala pay fire exit.

2. Disturbing nga kasaba’ sa nagpadayon nga trabaho.

3. Mga puting uniforme daling mahugaw, gumikan sa abog.

4. Wala pay tiles ang mga gigamit nga classrooms.

5. Ang ilang maagian nga classrooms paingon sa 6th floor wala pay mga partition.

6. Ang mga CR anaa ra sa 3rd floor. Magsuroy-suroy una ka gikan sa 6th floor     una ka ma-comforted.

7. Wala pay igong parking space. Bayad sila sa E-mall pag-park.

8. Wala pay mga fire safety gadgets, di pa kono motrabaho ang mga sprinklers.  

9. Wala pay occupancy permit.

Kun tinuod ning tanan nga gi-alleged dinhi, kinsa may naghatag og partial occupancy permit? Miingon sila nga wala konoy violation nga nahimo. Dili ba diay violation ang mga gi-alleged sa itaas?

Unsa man ning mga reklamo sa mga estudyante? Di ba mo-come in dinhi ang DepEd, pagsuta sa kahimtang sa mga estudyante? Wala bay labut ang gobiyerno niini, ang DepEd in particular, pagtan-aw sa safety and convenience of the students?

Ug si Pedro, sa iyang kakabus, nakapangutana gyud kun di ba gamay ra kaayo ang 10 mil pesos nga multa nga gipahamtang sa OBO. Apan, kun walay violation, nganong multahan man?

Nalipay kita nga sila si Mayor Tomas Osmeña ug Vice Mayor Mike Rama namahayag nga wala silay gipalabi kun pagpatuman na sa mga balaud ang hisgutan. Good!

Ug balik sa pangutana: Kinsa may naghatag sa partial occupancy permit? Ikaw, Dro?