P100 ray sweldo
Niining bahina sa akong lindog, mao na usay akong hatagan og pagtagad kining reklamo sa usa ka trabahante nga wala magdawat sa hustong suweldo segun sa nahilatid sa balaod. Nakahukom kong tukion kini kay nagtuo ko nga dili kay siya ray nabiktima niining maong matang sa panikas sa mga employer.
Ang iyang text nagkanayon: ”Good day, Sir. Nia lang unta koy reklamo. Bahin kini sa akong pagpanarbaho. Naglibog ko kun asa ko mosumbong niini. Ang problema nako sa akong amo mao ang akong suweldo. Mag-tuig na ko sa pagtrabaho pero P100 lang gihapon ang akong suweldo nga inadlaw. Pero ang gipapirmahan niya diri sa among lungsod P400 per day. Ako ra ba ang nakapadaghan og customer sa ilang tindahan. Karon may gikuha sila nga kauban nako sa trabaho nga paryente ra sab nila. Bati kaayo og batasan, Sir. Unsa may akong buhaton aron makabalos ko ani nila? Usahay dili pa ko suweldohan kay kuno gamay ra ang kita. Hago baya ang akong trabaho pero ilang giabusohan ang akong kaayo. Tawga lang kog Ruel.” -- 0919-2372427 (
Una sa tanan, higalang texter, akong ipahinumdom nimo nga dili maayo ang paghimog panimalos. Kun mohimo man kitag lakang batok sa abusadong mga tawo, kana aron makab-ot nato ang hustisya sa atong mga katungod nga giyatakan.
Ang paghatag sa imong amo nganha kanimo og inadlaw nga suweldo nga P100 dakong kalapasan sa balaod sa pamuo kay wala man kini makaabot sa minimum. Kun wala ko masayop, kapin na sa P200 ang minimum wage karon sa Sugbu. Busa ang paghatag og suweldo nga P100 wala mahisubay sa gilatid sa balaod.
Dugang niini, tukionon kaayo kun nganong gipapirma ka man og P400 per day nga suholan bisan P100 ray imong nadawat. Morag dunay nagpaluyong binuang niini nga angay mong masayran. Ug kanang imong giingon nga usahay dili ka suweldohan kay gamay rag kita, dako gihapon kanang binuang.
Kun kursonada ka gyud nga mopasakag reklamo batok sa imong amo, dangop sa buhatan sa NLRC aron kagiyahan ka sa angay mong buhaton.
(Sumbong ug reklamo? Text sa 0910-8105522)
- Latest
- Trending
