Human security act

Kaniadtong miaging semana pormal nga gilusad sa Malakanyang ang Human Security Act atubangan sa mga representante gikan sa Amerika ug ubang kanasuran. Mitambong usab ang mga Pinoy nga kanhi biktima sa kidnapping sa mga terorista didto sa gawas sa nasud. Didto usab ang Italianong pari  nga si Giancarlo Bossi nga bag-ohay pa lamang gibuhian sa iyang mga kidnappers. Gipanghambog sa Malakanyang ngadto sa mga Amerikano ug ubang kanasuran ang Human Security Act kun kontra terorismo nga balaod nga maoy makapaminos kon dili man ugaling mawagtang ang mga terorista. Matud pa sa Malakanyang nga tungod sa Human Security Act mawagtang na unya ang mga pagpamomba nga nahitabo dinhi sa ato.

Apan si kongresista Pablo Garcia nga akong nahinabi sa akong tulumanon Saksi Evening Edition sa DySS kaniadtong Sabado miingon nga ang Human Security Act depektuso ug walay ngipon ug gani matud pa niya mas epektibo pa niini ang Anti-Wire tapping Law. Matud pa ni kongresista Pablo Garcia nga basi sa definition sa Terrorism sa Human Security Act, ang terrorism mahimo lamang sa usa ka tawo o grupo kun ang krimin sama sa pagpamomba gihimo aron mapugos o pugson ang gobyerno sa paghatag ngadto sa ilang gidimanda o gipangayo. Busa kadtong Rizal Day ug Super Ferry bombing dili kadto makonsiderar nga terrorism kay wa man kadto himoa aron mahatag sa gobyerno ang mga gipangayo sa mga terorista.

Gisaway ni kongresista Pablo Garcia ang liderato sa ubos balay balauranan sa pagkapasar sa kontra terorismo nga balaod tungod kay wa kini tun-i pagmaayo. Matud pa sa kongresista nga ang Human Security Act resulta sa wa na pagsunod sa proseso sa pagpalabang og balaod tungod kay ubos sa pamunoan ni Speaker Jose De Venecia, ang mga balaodnon nga gipalabang kasagaran niini wa na ipaagi sa debate, gipapirmahan na lamang kini diritso sa mga kongresista dayon approved na.

Kay depektuso ang kontra terorista nga balaod dapat lamang kining dili ipatuman tungod kay nag-usik-usik lang ang atong gobyerno sa iyang panahon ug salapi sa pagpatuman niining balaod nga walay ngipon.