Kun di mohatag

Kining atong ulohan maoy unod sa reklamo sa usa ka texter mahitungod sa badlongon kaayong mga dispatser diha sa Colon area. Makadaghan na kita maghisgot nianang maong mga dispatser apan ingon sa wala pay kataposan ang mga reklamo nga atong nadawat. Nagmatuod lang kini nga daghan gayod ang napuwerhisyo sa modus operandi nianang mga dispatser diha sa Colon. Hain na man ang anti-dispatching ordinance?

Ang atong texter nagkanayon: “Hi...! Naa unta koy ireklamo. Kanang dispatser sa Colon, magsige man nag pangolekta namo bisan bag-o pa ming nakagawas kolektahan gihapon. Mobahad ra ba nga kun dili ko mohatag, suyakan ko nila. Unsaon na man lang na sila? Pamusilon lang ba kaha na namo? Bahin anang  mga CITOM diha, ilaha man god na. Labina nang mo-duty og alas 8-10 sa gabii. Usa ko ka driver og Alumnos nga rota. Dugay na kong nag-antos ana nila. Gusto kong madakop labina nang panggabii nga dispatser.” -- 0906-5227178 (May 17, 2007 --07:50:40)

Una sa tanan, higalang texter, ako moingon nga ayaw ibutang ang balaod sa imong kamot. Kun pamusilon mo kanang maong mga dispatser, mosamot ang problema. Kinsa na man lang unyay mosuporta sa imong pamilya kun mabilanggo ka? Hinumdomi nga ang usa ka suliran dili masulbad pinaagi sa pagmugna og laing suliran. Labing maayo nga ipaagi nato sa diplomasya ang tanan aron walay problemang mahiagoman.

Makasimpatiya ko nimo sa gipagawas mong sentimento tungod kay sobra na man sab kaayo ang pag-abuso nianang mga dispatser. Ambot ug ngano nga nagpadayon pa man gihapon sila sa dayag nilang modus hangtod karon bisan makita pa sila sa mga awtoridad. Usahay lagi, dili ta makalikay sa pagduda nga may “nagbuhi” nianang maong mga dispatser kay untouchable man sila kaayo.

Duna tay anti-dispatching ordinance sa dakbayan sa Sugbu pero hangtod karon wala pa gayod kini ikapatuman sa hingpit. Kulang sa ngipon? Ambot lang. Nakadungog kog balita nga palig-onon pag-ayo ang maong ordinansa. Maayo hinuon. Ug hinaot nga kun ikapatuman kini sa hingpit, may ngipon na kining makapahit sa badlongong mga dispatcher sa dakbayan sa Sugbu.

* * *

(Sumbong ug reklamo? Text sa 0910-8105522)