Reklamo batok fixer sa NSO

Gikan sa cellphone number  0915-7484487: “Good day, Sir. Unsa man nang NSO nga daghan mang fixer? Luoy kaayo mi nga mangadlawon paglinya kay igo-igo ra ang among kuwarta. Unya kun naay bag-ong moabot ilang duolon ug pasaligan nga sila (mga fixer) maoy molihok. Bungatan nilag kantidad ug kun magkasinabot ipahiluna pa nilag palingkod sa sulod. Kami nga nangadlawon og linya luoy kaayo kay mahaponan na lang og pinaabot kay sigeng insert ang mga fixer sa bag-o o ulahing aplikante nga naay kuwarta ug nibayad nila. Wala ba diay makabadlong niini, Sir?” -- March 28, 2007 -- 06:42:13)

Ngano gong walay makabadlong? Kun mangisog kamo sa pagtaho ngadto sa mga awtoridad sa gibuhat nianang maong mga fixer, seguradong masikop kanang mga tawhana. Diha na man gani toy gipangdakop nga mga fixers. Pero daghan gyud tingali ang mga fixer diha mao nga bisan diha nay gipangdakop nagpadayon gihapon ang maong mga badlongon sa katilingban sa ilang binuang nga kalihokan.

Ang hinungdan gyud kun nganong nagpadayon ang mga fixer sa ilang kalihokan mao nga kanunay gyud nga makalusot ang mga transaksiyon nga ilang ipahigayon. Identified na man gyud kanang mga fixer, dili na lang gayod unta hatagan og higayon nga makasulod sila diha sa buhatan sa NSO aron dili na sila makapasalir sa ilang tinonto. Gawas nga nakahatag silag kahasol sa mga aplikante, bunalan sab nila og dinagkong kantidad ang mga aplikante nga mogamit sa ilang serbisyo.

Mahimong manghunaw ang taga NSO sa planggana ni Pilato pinaagi sa pag-ingon nga wala siyay awtoridad pagkontrolar sa mga fixer kay dili man kini ilang tawo o dili ubos sa ilang superbisyon. Pero may gahom sila sa pagpatuman og mga sumbanan diha sa maong buhatan. Kun magpatuman silag sumbanan nga dili na makasulod ang mga fixer aron pagpangagni og mga aplikante, nagtuo kong magkahinay ang fixing activities.

Dili nato angay kondenahon ang NSO sa binuhatan sa mga fixer. Ang maayong buhaton mao nga kun kamo mabiktima niining mga tawhana, ayaw kamo pagpanuko sa pagdangop ngadto sa mga tinugyanan sa balaod aron masikop kining mga tawhana.

(Sumbong ug reklamo? Text sa 0910-8105522)