Dispatser sa Colonnade

Dili ikalimod nga problema gyod sa mga driver kining modus operandi sa mga dispatser. Makahasol man god ang gihimo niining maong mga dispatser nga mangayog kuwarta sa mga driver. Makadaghan na ko makasaksig ingon niini nga hitabo. Sa akong tan-aw sa bisan unsang anggulo, wala gayod kinahanglana sa mga driver ang serbisyo niining mga dispatser.

Dugtong niining maong hilisgotan, nakadawat kog text  nga nagkanayon: "Good day, Sir. Puyde ipadakop ning mga dispatser diri duol sa Colonnade Mall? Mangayo man sila og kuwarta sa pasahero ug sa taxi driver." -- 0918-7668901 (April 21, 2007 -- 14:38:15)

* * *

Kon tinuod man ugaling kining sumbong nga atong nadawat, makaingon ko nga grabe na gyod ka baga og nawong kanang mga dispatser nga nag-operate diha duol sa Colonnade Mall. Tiaw ba nga gawas sa taxi driver, pangayoan man pod nilag kuwarta lakip ang mga pasahero? Klarong extortion kining ilang gihimo. Usa ka dakong binuang. Binugoy! Binagis! Dili kini makataronganon.

Atong sangpiton ang atensiyon sa mga tigpatuman sa anti-dispatching ordinance sa dakbayan sa Sugbu. Mamalihog ta nila pagbadlong niining mga dispatser nga abusado kaayo. Dili man lisod monitoron ang kalihokan niining maong mga dispatser kay segon sa kasayoran nga gipadangat sa atong texter, naa sila mag-operate duol sa may Colonnade Mall. Busa kon maaktohan, dali ra silang dakpon.

Hangyoon nato ang tigpatuman sa anti-dispatching ordinance sa pagpaniid sa kalihokan niining mga dispatser.   Kon masakpan sila sa akto nga naghimog extortion ngadto sa mga taxi driver ug sa mga pasahero nga mosakay sa taxi, angay silang dakpon dihadiha. Dili maayong i-tolerate kining ilang binuang nga buhat.

* * *

Sa laing bahin: "Daghan kaayong PUJ sa Mandaue ug Opon nga walay mga taripa. Unsaon nga gipasagdan ra man sa LTO ug walay grabeng dakop maong way nitagam." — 0918-3605301 (April 19, 2007--22:21:26)

Atong hangyoon ang LTO sa paghimog lakang mahitungod niini.

(Sumbong ug reklamo? Text sa 0910-8105522)