EDITORYAL —Pahalipay ngadto ni Teban

Pahalipay ngadto ni Provincial Board Member-elect Julian “Teban” Daan tungod sa iyang kadaugan.

Pahalipay usab ngadto kaniya tungod sa iyang wala pag-ukon-ukon sa pagdeklarar sa iyang kuwartang nagasto atol sa miaging eleksyon.

Si Daan maoy labing unang mananaug nga kandidato dinhi sa Sugbu nga mihatag og kwentada sa iyang nagasto diin ang total niini mikabat lamang og P270,000.

Ang nagasto ni Daan sa iyang kampanya wala gani  katunga sa kumingking sa uban nga naninguha usab sa paglingkod sa Hunta Probinsyal.

Nidagan si Daan nga usa ka independent candidate. Walay partido, busa walay pundok politikal nga mitabang kaniya.

Usa ka komedyante sa radyo, tv ug pamantalaan (ang iyang humor column uban sa iyang partner nga si Goliat mabasa matag adlaw sa Banat News) si Daan ug  kini suma pa sa mga tigpaniid maoy nakatabang og dako sa kadaugan bisan walay partido nga misagop kaniya.

Among sublion ang pagtunol sa among pahalipay ngadto ni Teban, ang komedyante nga seryoso sa iyang pagkasulogoon sa lungsod.