P322 bayri intawon

Nalingaw ko’ng nagbasa sa balita sa page 4 sa Banat News kagahapon nga ang Genuine Opposition nga gipangulohan ni congressional candidate Jonathan Guardo wala makabayad sa P322 nga kulang sa bayad sa ilang gikaon sa usa ka balbakuahan sa Doña Maria I Village sa Punta Princesa.

Paita! Pila ra man intawon na’ng P322, nagdumili pa gyud sa pagbayad ang mga tawo ni Guardo?

Si Kapitan Joe Navarro sa Punta Princessa mi-react sa maong isyu nga migawas usab sa The Freeman ug miingon, "kagamay ra anang isyuha."

Gamay ra gyud tinuod na’ng P322, apan ang tinuod nga wala kamo mamayad sa saktong bayranan sa inyong gikaon nga wala pa gani modaog si Guardo pagka-kongresista, unsa na kaha unya og ma-kongresista na.

Gikan sa iyang pagpanghaylo sa mga botante sa south district nga mamayad siya’g singko mil pesos kada banay kun mo-vote straight ngadto sa pag-isyu og tseke sa LBC nga mitalbog hangtod sa iyang pagdumili pagbayad sa back wages sa mga massage attendant nga ilegal nilang gitaktak ug karon ang pagpamago og P322, unsa nga klaseng kandidato si Guardo diha sa south district?

Gamay ra man intawon kaayo nang P322, maayong awhagon nato si Guardo nga bayaran na lang niya ang maong kantidad tungod kay nakadaot sa iyang pagka-tawo ang maong isyu.

Mosugot siya’g sa dili, magamit sa atbang sa politika ni Guardo ang isyu nga P322 nga utang sa balbakuahan bisan unsa kagamay sa maong nalambigit nga kantidad.

* * *

MAYOR. Sunod semana sumad karon maglinya na kita sa tagsatagsa nato ka presinto aron sa pagpili sa mga tawo nga gusto natong modumala sa renda sa pangagamhanan.

Samtang nagkaduol ang adlaw sa eleksiyon, nagkadaghan ang bayolenting mga insidente nga naglambigit sa politikanhong kalihukan karong Mayo 14.

Usa niini ang nahitabo ni kanhi Mayor Rogelio "Dokdok" Illustrisimo Sr. nga midagan pagka-mayor sa iyang lungsod sa Sta. Fe, isla sa Bantayan tungod sa pagpupos sa termino sa iyang anak nga si Mayor Rogelio Jr.

Sa mga eleksiyon nga akong namat-an og buot, karon pa ko nakabati nga mikurog ang tibuok lalawigan sa nahitabo ni kanhi Mayor Dokdok. Sa mga nakaila niya, nakapangutana intawon "sa tanan, nganong si Mayor Dokdok pa man" nga masabot natong maayo gyud diay siyang tawo.

May mga mayor nga sama ni Mayor Dokdok ka maayong tawo. Sama pananglit ni Mayor Thadeo Ouano, bisan tuod nadat-ogan siya sa daghang isyu, apan daghan gihapong Mandauehanon nga mobarug nga ang ilang Mayor Teddy duol kaayo sa ilang dughan tungod sa mga programa niining deretso sa mga kabus nga banay.

Maayo unta og mangliwat kaniya ang anak ni Mayor Teddy nga si Jonkie ug mahisama siya sa iyang amahan nga duol siya sa dughan sa mga Mandauehanon, engkaso og siya na ang mayor human sa bugnoy’ng lugaynon sa Lunes.

Sa mga tigpaniid sa politika sa Mandaue, maliso pa’y buko sa kawayan, mura’g malisod ilugon ang liderato sa Mandaue gikan sa mga Ouano.

Dili ko interesado sa politika sa Mandaue tungod kay lumad ko’ng taga-south district sa Cebu City, apan kaniadto pa’ng madunggan ang pagtuong malisud na bawion ang sentro nga gigunitan sa mga Ouano sukad pa sa apohan nga si kanhi Mayor Pedong Ouano ngadtong Jonkie Ouano.

Laing mayor nga nasobrahan sa pagka-maayong tawo mao si Mayor Socrates Fernandez sa Talisay. Apan motuo kamo’g sa dili, ang pagka-maayong tawo ni Brod Soc maoy nagsilbeng "sekreto" niya nganong ang mga tawo mopilit gyud niya bisan unsa pang klaseng pagpanghaylo ang gihimo sa iyang mga kaatbang.

Ang mga mayor sama nilang Mayor Dokdok, Teddy ug Soc taliwas kaayo sa mayor sa siyudad. Kun maghisgut og Tomas Osmeña, walay laing hulagway nga atong makulit sa atong utok, ang pagka-arogante dayon niya.

Ambot og unsay karakter sa kaatbang ni Tomas nga si Mary Ann delos Santos. Apan ang matuod, usa siya ka babaye nga mas makamao mopaubos ug mas lawom kun makighugoyhugoy sa katawhan.

Miuban man gani ko sa mga tawong midayeg ni Mary Ann kay sa tanang naghugonhugon pagpakigsakbang ni Tomas, wala maapil ang ngalan ni Mary Ann, apan takulahaw lang midesisyon siya pagpakig-atbang aron mahatagan og maayong "choice" ang mga Sugboanon.