Panglimbong ni Guardo dili angayang tuohan

Lawom pa sa langub ang pagkadulot sa mga pagpanglimbong ug pasalig ni Jonathan Guardo ngadto sa mga kabus nga lumolupyo sa south district.

Naluoy ko ug naglagot nga naghunahuna nga lakip sa mga paryente sa akong kapikas apil sa nailad sa pasalig ni Guardo nga magpabaha kini og kuwarta atol sa eleksiyon.

Si Leah nga asawa sa igsuon sa akong kapikas mahinambugon nga mibalita kanako nga may miduol kanila nga silingan ug lider ni Guardo diha sa ilang sitio sa Barangay Sawang Calero ug mitanyag nga kun mo-"vote straight" sa Tribu Guardo aduna silay P5 mil nga madawat.

Porbida, klaro kaayong pangilad!

Kamo kunoy hunahuna unsaon nila pag-detect kun ang tanang miyembro sa usa ka pamilya mibotar ba sa tanang kandidato sa oposisyon?

Gihimo lamang kana aron segurohon nga ang mga kabus nga mga botante sa habagatang distrito adto mobotar sa mga kandidato ni Guardo.

Hala, kamong mga paisano nako sa south district, ayaw gyud mo og tuo kun may mga lider sa politiko nga moduol kaninyo unya motanyag og salapi kun mobotar ngadtong Guardo.

Dili gyud na tinuod kay dili ma-trace ang inyong mga balota pagsota kinsay inyong botaran.

Kun may salapi nga itunol, hala dawata ug ibulsa unya pasaligi sa ilang gusto apan ang inyong konsensiya maoy sunda, ayaw ang ilang palingla.

Wala baya gyuy problema kun makadaog ang mga kandidato sa oposisyon ug mismo si Guardo, kun dili lang unta linglahon sa ingon nga paagi ang mga kabus nga residente sa south district ug ang ilang pagbotar subay sa ilang konsensiya.

Unsa naman lang gyuy pagtuo ni Guardo sa mga tawo sa south district, mga nawong og kuwarta? Kining iyang gibuhat pagsaad-saad og bayad bugti sa boto usa ka dakong bugalbugal ug insulto sa paminsar sa mga botante sa south district.

Dili niya malingla ang mga tawo sa south district, mao kini ang akong pagtuo.

Hangtod dili maundang akong pagkadungog og mga saad binayranay diha sa among distrito, dili ko mo-undang og latigo ni Guardo.

* * *

TUBIG. Angayang suspensohon sa katungdanan silang Kapitan Romeo Ocarol Sr. sa Pasil ug ang iyang tresurera nga si Corazon Veloso aron dili maka-impluwensiya sa nagpadayong imbestigasyon sa Ombudsman-Visayas tungod sa wala nila paghatag og husay sa kita sa water refilling station nga gipanag-iya ug gidumala sa barangay.

Maayong sampolan sa Ombudsman ang pagpahamtang og preventive suspension nilang Ocarol ug Veloso aron makita sa ubang mga opisyal sa mga barangay kang kansang water refilling project gikan sa pundo sa mga politiko gikawkaw ug gipangwaldas lang ang halin.

Dili lang ang Pasil maoy adunay water refilling station nga gidumala sa barangay. Apan may nakabalita kanato nga ang uban nasira na lang wala gyuy husay nga nahitabo sa halin niini ug malisud na masubay hain paingon.

* * *

WAGAS. Ang kampo ni Antonio Yapha ug Clavel Asas-Martinez naglaum ni Gilbert Wagas nga maka-"bagdok" batok sa mga Durano aron maka-deliver og botos alang sa ilang slate.

Mismo si Clavel nagtuo nga adunay dakong posibilidad nga mapuo ang tahud sa mga Durano diha sa kinto distrito nga si Gilbert maoy kaatbang ni Red Durano ug nga ang mga tawo sa mga Durano sa kalungsoran sa kinto nagkatibulaag na.

Ang Compostela nga balwarte sa mga Wagas mibutang sa igsuon ni Gilbert nga si Richie kinsa nakahimo pagkuha sa suporta sa tulo ka dagkong barangay diin usa niini maoy gisaligan sa mga botos nga nakapadaog ni Mayor Antonio Danggoy kinsa nagmasakiton na karon.

Gawas sa upat ka lungsod sa isla sa Camotes nga dili sold-out sa mga Durano, ang Catmon nagpabilin nga anti-Durano municipality ug ang Sogod kang kansang mayor nga si Thadeo Durano nagmasakiton hinungdan nga nag-atubang kini og higanteng hulga nga mabawi sa kontra nga si Francisco Conahig, retiradong opisyal sa kapolisan.

Hilom nga nagkataykatay ang pagkondenar sa mga puwersang nakigbatok sa mga Durano. Apan nagtuo ko nga dili mosalir ang maong puwersa kun walay ituboy nga lider nga may ensaktong kaisog sama ni Gilbert pagbarug ug paghiusa sa anti-Durano forces sa kinto.