Huling payo kay Pacquiao

Nagwagi na naman – panalo na naman

ang ating bayani na si Manny Pacquiao;

Talagang magaling siya sa suntukan

kaya di manalo sino mang kalaban!

Nitong huling laban nakabangga niya

mataas ang tindig at mukhang bata pa;

Nguni’t sa taktika’y walang laban siya

kung kaya nagapi nitong ating bida!

Kaya nang sumapit ang ika-8 round

kalaban ni Manny ay di nakatagal;

Dalwang beses ito na napahandusay

di na makatayo nang huling bilangan!

Kahi’t sinong boxer kay Manny iharap

sa kanyang dibisyo’y di dapat mangarap;

Ngayo’y "golden era" ng lalaking tanyag

di pa tatalunin sa taglay na lakas!

Ang pitak na ito’y laging nagdarasal

sa bawa’t laban mo’y laging magtagumpay;

Pero sa laban mong pulitika naman

sana’y huwag mo nang ituloy kabayan!

Pagka’t nagwagi nga’y posibleng ituloy

ang para sa amin ay maling ambisyon;

Ang maging congressman sa ating panahon

baka manuntok ka pag ika’y napikon!

Mga kongresistang doo’y kasama mo

tiyak sa debate’y di mo matatalo;

Ang pagtataluna’y ang pera ng tao

kung pa’no kukuni’t nanakawin ito!

Milyonaryo ka na at maraming pera

maganda ang s’werting sa iyo’y napunta

Bakit papayagang makuha ng iba

pera’t katanyagang ngayo’y hawak mo na?

Pagka’t di pinansin ang payo ko noon

itong huling payo’y ibibigay ngayon:

Kung ang nais mo lang sa baya’y tumulong

di man pulitiko magagawa iyon!