Maayong tinud-on gyud

Hinaot nga manakod ang gihimo sa Mandaue City Police Office ngadto sa kapolisan sa ubang mga dakbayan ug kalungsoran diin nahimutang ang LTO district offices. Ang buot kong ipasabot mao kadtong pagkasikop sa duha ka fixer diha sa Mandaue LTO nga giaksiyonan gilayon sa kapolisan sa Mandaue human sila makadawat og reklamo gikan sa mga nabiktima sa maong mga fixer. Maayong tinud-on gyud paggukod ang mga fixers diha sa LTO-Mandaue. Kadtong duha nga nadakpan identified na kaayo nga fixers diha sa LTO-Mandaue busa labing maayo nga mapasakaan dayon sila''g kaso.

Kun ingon niini ang buhaton sa kapolisan, nakaseguro kong mosalig ang atong kaigsuonang mabiktima sa fixers sa pagdangop kanila. Mao gyud kini ang angay buhaton kun mabiktima kag binuang. Mosumbong gyud ngadto sa mga awtoridad aron matawag ang atensiyon sa mga badlongon sa katilingban. Magdasa kanang abusadong mga fixer kun dili lang magpakabana kanang ilang mga nabiktima.

Maayo man gani nga dili na lang maghulat ang mga awtoridad nga aduna silay complaint nga madawat gikan sa usa ka biktima og fixer ayha pa sila molihok. Mahimo man nga mag-monitor sila sa kalihokan sa mga fixer. Ilang i-counter check kun tinuod ba ang hungihong nga adunay fixers nga naglihok diha sa LTO-Mandaue. Ug kay nakaseguro man gyud ko nga mamukdahan gayod nila ang mga fixers nga nagbahasbahas diha adlaw''ng tanan, siyarog wala silay madakpan. Identified na god kaayo nang mga fixers dihang dapita. Ug klaro man nga naghatag silag kahasol ngadto sa mga aplikante sa LTO.

Aron mahatagan og ideya ang kapolisan, nakakuha kog listahan gikan sa usa ka kasaligang tinubdan nga adunay dili momenos 40 ka fixers nga nag-operate diha sa Mandaue LTO. Busa kadtong pagkasikop nilang Ian Estopa ug Jupiter Sungahid dili makapahunong sa hingpit sa fixing activities diha sa LTO-Mandaue. Labi na gyud kun dili mapasakaan og kaso kadtong duha nga nadakpan.

Niay gamay''ng tip alang sa mga awtoridad. Sumala sa akong impormante, adunay usa ka Totong nga food server apan nag-fixer usab sa buhatan sa LTO-Mandaue. Laing fixer mao ang usa ka John M., Vito, Toto, Lito, Dick, Neptune L. ug Kennet A. Mao lang ni ang pipila sa 40 ka fixers nga naglihok diha sa LTO-Mandaue. Panid-i ninyo kining mga tawhana aron pagsuta sa kamatuoran.

* * *

(Sumbong ug reklamo? Text sa 0910-8105522)