Pukaw sa tanlag

Tugotan ba lang nato nga ang eleksiyon sa Mayo 14 karong tuiga mahisama sa nangaging mga eleksiyon? Nga ang kinabag-an sa mga mananaog kutob lang sa pagsaad apan wa gyoy nahimo sa paghaw-as sa kinabag-an sa atong katawhan gikan sa labihang katimawa nga ilang nahiagoman? Nga ang mga botante, sa makausa pa, magpanlingo nga napakyas na sab sila sa paggamit sa ilang balaanong katungod sa pagpili aron pagpatuman sa dugay nang gidamgo nilang kausaban?



Wa na ba lang gyod tay laing mahimo gawas sa pagpaantaw ug masulub-ong pagsud-ong sa way kinutoban nga tuyok sa marka-pataka nga pagpili sa nagpiyong o nabutaan nga mga botante, paglingkod sa mga kandidato nga maoy nakapabaha sa labing daghang bakak ug labing dakong kuwarta ug pagpahimus nila sa katungdanan pinaagi sa pagtilok sa namiyahok nang daan nga nasudnong panudlanan?

* * *

Nahukman sa kadagkoan sa Kapisanan ng mga Brodkaster ng Pilipinas (KBP) Cebu Chapter sa paghimo sa ilang gamay'ng tampo pagtabang pag-andam sa katawhan sa higanteng tahas pagpatigbabaw sa hiniusa ug makiangayon nilang tinguha pagpili sa labing takos, labing ligdong ug labing matinud-anon sa mga nag-ilogay pagkuha sa ilang pagsalig ug pagpaluyo.

Nasabotan nila ang paggamit sa labing gamhanan nilang kahimanan'ang pagtambayayong sa tanang sakop sa mga estasyon sa radyo ug telebisyon sa Sugbu pagtingog isip usa ka pagsuway paghinol sa kasingkasing, pagpukaw sa tanlag ug paghaling sa kaamguhan sa katawhan nga di pa uwahi ang tanan, nga karon sama sa nangaging mga eleksiyon mao ang labing tukmang higayon paglihok alang sa bag-ong sinugdanan.

Pormal nga ilusad nilang KBP Cebu Chairman Edward Abad ug kaubanan karong adlawa ang KBP Election plugs nga maoy modominar sa mga estasyon sa radyo ug telebisyon sa kinatibuk-ang langyab sa kampanya hangtod na sa adlaw sa pagpili.

* * *

Si Bong Aznar sa RPN 9 maoy nitataw sa panginahanglan paghimo og plug nga mas mahagiton kay sa naandang "Vote Wisely" nga kampanya. Si Chairman Abad maoy nisugyot nga ang mohatag og kinabuhi sa plugs mao ang labing inilang broadcast icons sa Sugbu kansang mga tingog panagsa na lang madunggan sa kahanginan.

Niadtong Martes sa hapon, niawas sa among kasingkasing ang tumang kalipay pagkakita nilang Manny delos Santos Rabacal, Emil Rizada Jr. ug Atty. Al Buenaventura sa studios sa DYUR (Ultimate Radio) nga giduma ni Debbie Go. Uban nilang Rufil Banuc, Abad ug Go, akong natugkad ang hinungdan nganong nahimong mga higante sa pagpanibya sa Sugbu silang Rabacal, Rizada ug Buenaventura. Sud lang sa lima ka gutlo, na-record nila ang tulo ka bersiyon sa plugs, gimbuhaton nga kasagaran untang maabtan og pila ka takna.

Manghinaot lang ko nga ang among kalinghod ug tumang pagsalig sa bag-ong mga teknolohiya di mopakyas sa bulawanon nilang mga tingog ug bililhon nilang mensahe.

* * *

Email: [email protected]