Kainit sa panahon

Hinay-hinay nang natagamtaman ang epekto sa nagusbat nga ozone layer nga mao untay motabon sa kalibutan gikan sa grabeng kainit sa adlaw. Kung itandi sa mga milabay nga katuigan, mas init ang "summer season" karong tuiga. Matud sa mga eksperto, sama sa PAG-ASA, nakatampo sa kainit ang pagkabuslot sa ozone ang polusyon, pagpamutol sa mga kahoy, kaingin ug uban pang kalihukan nga niguba sa kinaiyahan.

Unang nakasinati sa dili maayong epekto sa kainit ang mga mag-uuma nga naapektohan ang abot sa umahan tungod sa init nga panahon. Dili usab kalidad ang ilang naani nga mga utanon ug uban pang produkto sa umahan tungod sa pagsiaw sa mga insekto nga sagad nga moigo ning panahon sa kainit. Wala usab kalikayi sa uban nga makapangawot sa ilang ulo tungod sa kakuwang sa tubig nga ilang ibisbis sa mga tanom. Adunay uban nga maglakaw pa og pila ka metro aron lang makakawos og tubig alang sa ilang umahan.

Ang mga mag-uuma ang naputos sa problema ug nabutang sa alaot ang panginabuhian tungod sa walay puangod nga mga motorista nga nagbuga og itom nga aso o sa mga pabrika nga walay laing gitan-aw kung di ang ilang ganansya. Luyo sa kampanya sa pribadong sektor ug gobyerno, layo pa ang abton ug daghan pa ang gikinahanglan nga buhaton aron matanom sa huna-huna sa katawhan ang dautang epekto sa pagbuga og hugaw nga aso dili lang sa panlawas sa tawo apan lakip na sa kalikupan, dili lang sa kasamtangang henerasyon apan sa mosunod pang kaliwatan.

Namatikdan sa kadaghanan ang lagiting sa adlaw nga daw mangusi na sa panit. Matud sa Department of Health, delikado ang init sa adlaw karon tungod kay maghatag ni og daghang sakit sa panit nga kung mograbe, moresulta pa sa cancer sa panit. Kung kaniadto alas diyes hangtud sa alas tres sa hapon ang giisip nga dili luwas nga magpainit, karon matod sa DOH, alas nuebe na sa buntag hangtud alas kuatro sa hapon ang labing init nga adlaw.

Usa sa labing epektibong paagi aron makalikay sa dehydration o kakuwang sa tubig sa lawas mao ang pag-inom og daghang tubig. Dili igo ang walo lang ka basong tubig matag adlaw. Matod sa mga eksperto, mas makatabang ang pag-inom og tubig gikan napulo hangtud dose ka baso sa matag adlaw. Sagad sa mga tawo, giingong dili makatagamtam nga nagkuwang na diay og tubig ang lawas. Ang pagsige og tulo sa singot maoy hinungdan sa mas paspas nga paggawas sa tubig sa lawas. Matud sa mga doktor makatabang usab ang pag-inom og preskong juice ug pagkaon og prutas nga abunda sa tubig.

Matud sa mga dermatologists, makatabang usab sa pagpanalipod sa direktang kainit sa adlaw ang kanunay’ng paggamit og payong, kawo ug uban pang butang nga makatabang aron dili magkasakit. May maayo usab nga epekto sa pagsul-ob ug mga sinina nga ginama sa gapas kon cotton. Makaiban usab sa kainit ang pagsul-ob sa mga sinina nga may "light colors". Mas maayong ipadaplin una ang mga saplot nga itom ang kolor.

Nunot sa nanggawas nga teknolohiya sa pagpanindot sa lawas, makatabang usab matod sa mga doktor ang pagbutang og "sunblock" sa dili pa mogawas sa panimay o sa mga buhatan. Ang sunblock maoy modepensa sa panit sa ultra violet race sa adlaw nga maoy makadaot sa sensitibong panit. Dugang sa mga eksperto, makatabang ang pagbutang og sunblock sa nawong, tangkugo, kamot ug uban pang bahin sa lawas. Gikinahanglan usab ang subling pagbutang og sunblock matag upat ka oras labi na sa mga tawo nga ana-a sa beach ug mga nagtrabaho ilawom sa kainit sa adlaw.

Apan sa matag kusi sa kainit sa lagiting sa adlaw sa atong mga panit, mas maayo sigurong mahinumduman ang dakong hagit pagpanalipod sa kinaiyahan. Sa matag tabang nga mahimo, dako na ni og matampo alang sa kinaiyahan ug mismo sa panlawas.