Ulahi na ang tanan, Tingting

Giguroy, gipansak sa van, gidala sa airport ug gipugos pagpasakay sa Cessna plane paingon sa Leyte si Bayan Muna party-list Rep. Satur Ocampo aron adto paatubangon sa kasong iyang giatubang sa korte sa maong lugar mahitungod sa mass grave nga nakit-an didto.

Apan samtang naglupad ang eroplano, nakadawat og kamanduan ang piloto nga ipabalik si Ocampo sa Manila ug didto kasamtangan una siyang buhian.

Nagduda ang kampo ni Ocampo nga may bendisyon sa Malacañang ang paggukod kaniya, ilabi na karon nga kusog kaayo ang ilang grupo sa mga party-list groups nga dumadaog sa Mayo 14 nga eleksiyon.

Sa Marso 2007 nga Ulat ng Bayan, 13 ka party-list groups, nga gipangunahan sa Bayan Muna, adunay dakong tsantsa nga makakuha og lingkoranan sa Ubos Balay Balaoranan. Sa maong survey, 11.9 porsiyento ang nakuha sa Bayan Muna, igo nga makakuha sila og tulo ka lingkoranan sa Kongreso.

Apan ang pagduda sa kampo ni Ocampo dili makatabon sa salaod nga nahimo niya kun tinuod man nga may kalambigitan siya sa pinatyanay sa Leyte.

Nasayod ang publiko sa pagka-tawo ni Ocampo sa wala pa siya mag-apil-apil sa kalihukan sa gobyerno. Dili malilong ang iyang pagka-walhon kaniadto isip sakop sa partido komunista nga nakahimo og daghang salaod, usa na ang "purging" (purga) sa ilang partido paglikay sa mga "deep-penetration agent" nga gitanom sa gobyerno sa ilang organisasyon.

Ang maayo atubangon na lang ni Ocampo ang kaso ug limpyohon niya ang iyang ngalan pinaagi sa pagdangop sa bisan unsang depensa nga anaa sa balaod aron maabsuwelto sa kasong nag-ung-ong na karon sa korte.

* * *

DEMOKRASYA. Ingon niini ka "colorful" ang demokrasya sa atong nasud. Bisan dayag na kaayo ang mga hiyas ug pagtulon-an nga batok sa gobyerno ang gitikangan sa usa ka tawo, dili gyud kini magukod sa balaod hangtod dili makahimo og "clear and present danger" sa komunidad.

Sa mata sa balaod, pabiling katungod sa tawo ang pag-apil-apil sa kalihukang politikal hangtod dili madeklarar sa korte nga "guilty" sa sala nga rebelyon, insureksiyon, kudeta, sedisyon o treason.

Si Ocampo, parehas sa laing duha ka senatoriables nga nag-atubang og kaso tungod sa ilang pakigbatok sa kagamhanan.

Armado niining demokrasya nga gihangop sa atong nasud, padayong gisulong sa kampo ni kanhi Senador Gregorio "Gringo" Honasan nga makapiyansa aron aktibong mangampanya sa iyang kandidatura pagka-senador.

Mismo ang amahan sa Local Government Code nga si Senador Nene Pimentel mitabang pagkumbinser sa kagamhanan nga tugotan si Gringo nga makapiyansa aron matibuok ang iyang pagbalik og sulod sa kalihukang politikal pinaagi sa pagpapili sa Mayo nga eleksiyon.

Ambot kaha og unsay mahitabo kun makapiyansa si Gringo, kay karon nga dili pa kaayo siya makalihok pagtuyoktuyok sa tibuok nasud taas man ang rating nga iyang nakuha sa survey sa mga senatoriables.

Laing bunga sa katam-is sa demokrasya sa nasud mao ang pagtugot nga makasang-at og sertipiko de kandidatura pagka-senador ni kanhi Philippine Navy Lieutenant Señor Grade Antonio Trillanes IV, bisan nag-atubang kini og kaso tungod sa pag-apil sa pakyas nga mutiny sa Oakwood hotel sa Makati niadtong Hulyo 2003.

* * *

PASAYLO. "Ulahi na ang tanan. Ulahi na ang tanan..."

Nakadungog man tingale mo nianang kantaha. Lami kaayo paminawon.

Mao kini angay kantahon atubangan ni Vicente "Tingting" dela Serna, kanhi kongresista ug gobernador sa Sugbu, tungod sa iyang ulahi kaayong pagpangayo og pasaylo sa mga Sugbuanon tungod sa iyang pagsuporta ni kanhi Pres. Joseph Estrada sa 1998 nga eleksiyon apan napalagpot sa katungdanan niadtong 2001.

Giangkon ni Tingting nga usa siya sa nailad sa propaganda sa kampo ni Estrada "Erap para sa masa" ug miingon nga wala gyud siya makadungog sa kanhi presidente nga maghisgot og proyekto alang sa kabus nga masa.

Pastilan! Pagkadakong abogado niining Tingting unya karon pa nakaamgo nga giilad ra diay siya sa mga Estrada?

Human makapahimulos sa administrasyon ni Estrada si Tingting isip deputy executive secretary, iya na kining gilibak ug gidaot, usa ka buhat nga dili maayo alang sa usa ka tawong may baruganan, kun naa man ugaling siya niini.

Dili ko pabor sa mga Estrada tungod kay kaniadto pa nahimo kitang kritikal batok kaniya ug gisigihan nato og Tikdol niining Banat News, apan ang gibuhat ni Tingting karon usa ka buhat sa tawong walay baruganan ug maayong batasan.

Mahimo niyang korehian ang iyang nahimo kaniadto sa dihang diha pa siya sa poder sa mga Estrada pinaagi sa paghimo og maayong buhat sa mga kabus karon.

Dako kanang hagit ni Tingting.

Apan tan-awon nato kun makahimo ba siya niana.

O gihimo lang "opener" ni Tingting ang iyang pagmahay karon aron mo-guwapo ang iyang dagway atubangan sa mga tawo sa siksto distrito asa siya buot magpapili pagka-kongresista sa Mayo nga eleksiyon atbang kang Kongresista Nerissa Soon-Ruiz ug Bokal Luigi Quisumbing.