Bulan sa kababayen-an

Ang Marso dili lamang bulan alang sa paglikay sa sunog. Kay sa makadaghang higayon, wala man gyud kita makalikay sa sunog. Ang Marso giila usab nga bulan sa kababayen-an.

Gisaulog kagahapong adlawa ang Bulan sa Kababayen-an dinhi sa Sugbu. Dungan sa maong pagsaulog, gipahigayon usab ang usa ka Women's Congress nga gisalmotan sa mga kababayen-an gikan sa lain-laing mga sektor. Gitambongan usab kini ni Pangulong Gloria Macapagal-Arroyo.

Angay gayud tingali nga magsaulog ang mga kababayen-an dinhi sa ato. Kini tungod kay kon ikomparar kita sa mga laing nasud sa Asya, tingali ang mga Pilipina maoy labing gawasnon. Adunay mga balaod nga nag-protektar kanato, sama sa Anti-Violence Against Women, Anti-Sexual Harassment ug Anti-Trafficking. Hinuon nagpabilin gihapon kadtong mga kinaraang balaod nga disbentaha sa kababayen-an sama sa mga balaod nga nagsilot sa pag-pangabit. Ug dinhi usab sa Probinsya sa Sugbu, pinaagi sa kakugi ni Bokal Agnes Magpale, ang Hunta Probinsyal mipasar sa usa ka Ordinansa nga gitawag og Women's Code of Cebu.

Dinhi sa atoa, wala nay diperensya ug dili na panumbalingon ang pagka-lalaki o pagka-babaye sa usa ka lider, propesyonal o trabahante. Gani ang Armadong Kusog daghan na mga opisyal nga babaye. Nakaagi na sab kitag duha ka Presidente nga babaye.





Ug labaw sa tanan, bisan ang atong mga kalalakin-an dili uyon sa diskriminasyon batok sa mga babaye. Aduna na gani kitay mga gitawag nga honorary women sama kang Propesor Ricky Poca ug kanhing Senador Raul Roco, tungod kay sila mi-kampeyon nga katungod sa kababayen-an. Maingon nato nga mas sophisticated kita sa sosyal nga aspeto kaysa ubang mga nasud dinhi sa Asya, bisan kon medyo biya kita kon ekonomiya ang hisgotan.

Samtang didto sa mga laing nasud, daw sirado pa ang pangutok sa ubang kalalakin-an. Niadtong miaging adlaw, gibalita ang linuog nga pagpatay sa usa ka babayeng Provincial Minister for Social Welfare didto sa Punjab, Pakistan. Gipatay siya sa publiko nga lugar tungod lamang kay naghupot siya og importanteng katungdanan. Mapagarbohon kaayo ang mamumuno nga miangkon sa iyang gibuhat tungod kay mao kuno kini ang sugo sa iyang relihiyon ug nga ang usa ka babaye walay katungod nga moangkon og katungdanan sa komunidad. Bisan gipasar na ang ilang balaod nga mao ang Women's Protection Bill nga mi-amender sa ilang Hudood Ordinances, ang ubang mga babaye didto mahadlok gihapon maglakaw nga mag-inusara kay basin og binuangan sa kadalanan tungod lamang sa ilang pagka-babaye.



Layo gihapon ang gintang sa kalalakin-an ug kababayen-an didto. Kining maong kalainan mao usab ang gipang-bati sa kababayen-an sa laing pang mga nasud sa Asya. Ang maong kultura nagsukad dili sa polisiya o gimbut-an sa goberno, kondili kasagaran tungod sa pagtoo o relihiyon nga walay respeto sa kababayen-an.

Atong makita dinhi kon unsa ka-manipulative usahay ang usa ka tinuhoan nga bisan ang usa ka klaro nga kasaypanan mahimong ipatuo nga usa ka dalaygon nga buhat. Ug ang labaw nga makapasubo tungod kay niining maong mga pagtuo, ang babaye nga maoy nag-uyog sa duyan sa kalibutan gipakasama na lamang nga mga manananap.

Bulahan ang mga Pilipinhong kababayen-an kay sila nakalingkawas na sa maong diskriminasyon. Congratulations kanatong tanan.

* * *

Alang sa inyong mga panahom ug reaksyon, palihug email sa [email protected] o text sa 0915-5536986. Daghang salamat.