P224,000 matag suga

Silang Gobernador Gwen Garcia, Mandaue City Mayor Teddy Ouano ug LapuLapu City Mayor Arturo Radaza di nang kabungul-bungol sa sibaw nga awhag sa kuwentada giunsa nila paggasto ang minilyon ka pesos nga gipabaha sa nasudnon ug lokal nga mga kagamhanan alang sa 12th Asean Summit niadtong Enero. Samtang nagpapating ug nagpabaga lang sila sa duha na ka buwan nga yangungo sa mga magbubuhis, mahimong mag-atubang na sila og mga kaso kon padayon gihapong tagoan giunsa paggasto ang kuwarta nga di ila.

Ang Visayas Ombudsman nimando na sa tanang lokal nga mga opisyal nga nakaapil sa pagduma sa niaging summit pagsumiter og liquidation sa labing daling panahon. Ang Dakbayan sa Sugbo, segun ni Public Information Officer Nagiel Bañacia, nakadawat sa ilang kopya sa kamandoan duha ka semana ang nilabay. Sa ato pa, karong semanaha na lang kutob ang lugway nilang Garcia, Ouano ug Radaza pagpanalipod sa ilang kaugalingon sa mga pagduda nga ang pagmaniobra sa mga dokumento maoy nakaungot sa kuwentada.

* * *

Samtang nagkapuliki pa silang Garcia, Ouano ug Radaza pagtuman sa kamandoan ni Acting Visayas Ombudsman Virginia Palanca-Santiago, hagbay rang nasumiter ni Cebu City Mayor Tomas Osmeña ang iyang liquidation. Maong hingpit nga nakalingkawas si Osmeña gikan sa pagkaduhig sa nangalisbo nga mga transaksiyon sa summit nga nagkadaghan nang mga ebidensiya nga nagpakita nga gihimo ra gyod diayng gatasan sa mapahimuslanong lokal ug nasudnong mga opisyal.

Dakong opisyal nga suhito sa kinatibuk-ang pangandam sa summit nipasabot nga, gawas ni Osmeña nga mabinantayong nituman sa tanang lagda, maglisod ang ubang mga opisyal paghatag dayon sa liquidation. Maong mahimong manghangyo sila sa Ombudsman og dugang lugway. Matod sa opisyal dunay pipila ka mga transaksiyon nga gipanglaktod, di tanan nakapasar sa batakang panginahanglan sa subasta, nga klarong kalapasan sa bag-ong balaod, ang Government Procurement Act.

Mao ba ni hinungdan sa paugat nilang Garcia, Ouano ug Radaza? O nangahubog na lang gyod sa ilang kahawod ug nakalimot na kinsay tinuod nilang mga agawon.

* * *

Hapit mahagbong sa iyang gilingkoran si Ombudsman Santiago atol sa tigom nga iyang gipatawag pagtuki sa nagkaklaro nga overpricing sa decorative lamps sa summit. Kay ang kadagkoan sa Department of Public Works and Highways, nga nag-atubang nag kasong plunder tungod sa giingong anomalusong pagbayad sa kontraktor sa surveillance cameras sa summit, dunay mas makapakugang nga kumpisal: Tag P224,000 ang matag usa sa deco lamps sa Dakbayan sa Mandaue.

Ang mga inhinyero sa Mandaue maoy nagtakda sa makabungog nga presyo bisan sa pagmatuod sa supplier gikan sa Manila nga tag P11,000 ra ang matag deco lamp. Nganong wa man kabaraw si Mayor Ouano sa klarong pagpaburot sa iyang paboritong mga inhinyero sa presyo sa awop kaayong mga suga nga wa ka-iwag hinunoa nakabuong sa summit?

* * *

Email: [email protected]