Kamera ug pamatasan

Ang tanang paggawal sa kadagkoan sa Kapitolyo sa kamapuslanon sa modernong mga kahimanan sa seguridad nga ilang gipakatap napapas sa dagkong mga bulilyaso nga wa nila mabadlong: Ang dakong sunog nga niugdaw sa kabahin sa ilang compound ug ang makauuwaw'ng pagpuga sa duha ka binilanggo nga gi-bartolina sa CPDRC.

Bun-og nang linya sa Kapitolyo pagtulisok sa tanang bulilyaso ngadto sa nagmika nga mga guwardiya ug pagpangugat nga mas dako pa untang kadaot kon di pa tungod sa surveillance cameras. Ang daotang balita mao ang kahigayonan nga ang pagpabaya nanukad sa pagtuo sa mga guwardiya sa propaganda sa ilang mga amo.

Ang mas daotang balita mao ang pasidaan sa pipila ka mga binilanggo nga ang padayong pagduma sa manghod ni Gobernador Gwen Garcia sa CPDRC-nga wa igdungog sa maayong pamatasan-mosangpot sa dugang jailbreaks, bisan bag-uhon pang ilang panghambog sa kamapuslanon sa mga kamera.

* * *

Nakabuylo na si Mandaue City Mayor Teddy Ouano paggukod sa iyang politikanhong mga kaatbang. Gipasanginlan siyang nanangtang sa mga kawani sa City Hall nga gipasud sa iyang mga kanhi alyado nga nakigbatok na niya, nipasimang sa mga tricycle aron nga di na kaagi sa buwangan sa kaatbang sa iyang anak, ug nipaibot sa basketball goal nga gimarkahan sa ngan sa samang kaatbang.

Gipasanginlan sab siyang nanggukod na sa mga barangay kapitan nga tua na magpaluyo sa iyang mga kaatbang. Usa nila nireklamo nga giputlan og suga ang ilang barangay hall maong nagdagkot na lang silag kandila aron makapadayon sa ilang sesyon. Angay'ng pahinumdoman si Ouano nga ang kataposang politiko nga namutol gipalayas sa mga botante. Gani, si kanhi kongresista Crisologo Abines mao na sab roy nagbagulbol nga giputlan sa iyang koneksiyon sa tubig sa Santander.

* * *

Wa na mabag-ohi ang mga Mandauehanon sa kamaginukdanon ni Ouano. May mga kapitan nang gipanguhaan sa ilang health workers tungod lang sa iyang pagduda nga nangampanya alang sa iyang pinanggang manghod nga si Mandaue City ABS Pres. Joy Ouano. Ang ABS-CBN nakatilaw sab sa iyang kabagis tungod lang sa akong mga komentaryo batok sa iyang pamunoan: Gilisud-lisod niyang among coverage sa 12th Asean Summit ug gibabagan niyang pag-ayo sa gubaon nga dan sa Basak ug Pagsabungan tungod lang kay naa ko magpuyo duol sa utlanan sa duha ka barangay.

Mga barangay kapitan nga nabiktima ug bisan ang mga nakasaksi lang sa iyang pangabuso wa nang kaagwanta. Mayoriya nila-15 sa 27-tua na magpaluyo sa pikas. Di tsamba nga ang sentro sa ilang mga reklamo mao ang anak sa mayor nga ilang gipasanginlan niyaka sa labing batakang mga panginahanglan sa ilang mga barangay. Karong Mayo 14, makaangkon nag kahigayonan ang mga botante paghukom sa duha na ka dekadang pamunoan sa mga Ouano.

* * *

Email: [email protected]