Naleksyon lagi

Matudloan g'yod og leksyon kadtong mga tawo nga masakmitan sa kapolisan og armas panahon nga rondahon ang ilang balay o kaha masakpan nga nagdala-dala og armas nga walay lisensya.

Leksyon kini kanila kay ang kagamhanan mihatag kanila og higayon nga mapalisensyahan ang ilang mga armas pinaagi sa Amnesty Program, diin lisensyahan ang ilang armas sa tumang kasayon.

Sayonan ka nga wala nay gikinahanglang dukomento nga pangitaon sa kapolisan sa pagpalisensya nimo, gawas lang sa papeles nga magmatuod nga ang imong ngalan dili buhat-buhat ra ug kon taga diin ka g'yod.

Pahalipayan nako ang kadagkoan sa Criminal Investigation and Detection Group nga gipangulohan ni Koronel Jose Jorge Corpuz ug Major Rex Derilo sa malampuson nilang gironda ug pagsakmit og armas sa balay ni Julius Acojedo, taga Cantabaco, Toledo.

Ang report mao nga kini si Acojedo pirming magpabuto og armas. Ang mga licensed firearm holders dili man gani hapit magpakita sa ilang armas, kini na hinoong mga walay lisensya ang maghinambugero.

* * *

Matag hisgot nako sa kandidatura ni Jonkie Ouano nga nagpahibalo na sa iyang pagpapili pagka mayor diha sa Mandaue, duna g'yoy mopadala nako og text message.

Nabantayan hinoon nako nga gikan ra kini sa upat ka cellphone numbers, apil na kadtong nagbinastos na sa iyang mensahe.

Dunay usa ka mensahe nga nagsaway kang Ouano kay kuno maoy nanag-iya sa usa ka club nga gidungog nga kusog kaayong magpasalida og hubo-hubo.

Dasigon nako ang holder sa cellphone 0905-7990910 nga padad-an ko niya og kamatuoran nga si Ouano ang tag-iya sa maong club kay pakit-on nako siya unsaon nako paglampornas dinhi sa lindog ang mayor.

Kabahin sa pasangil nga kurakot si Ouano, mora'g wala pa ko makadungog nga napasakaan og kaso nga "graft" si Ouano. Apan basin kon wala lang ko makabantay, padad-i ko, aron atong mapublikar.

Lisud man god nga maayo lang kita sa propaganda pagdaut sa usa ka tawo nga hinganlan nato og "corrupt" apan wala kita'y basihanan.

Pasabton ko kamo nga bisan dili ko botante sa Mandaue apan pabor kong Jonkie kay natan-aw nako nga sensiro siya nga moserbisyo. Sama god diri sa dakbayan, si Tommy Osmeña lisud pildehon tungod sa maayo niya nga mga programa.

Maayong tawo si Osmeña apan estrikto og mga lagda. Pinaagi niini, magkinto bisan kadtong iyang mga sakop. Ingon niini ang tukmang mga opisyal nga dili usab sayon-sayonon na lang.

Nakadungog ko nga ang pamaagi ni Jonkie, sama ra ni Tommy, maayong tawo apan estrikto pagpatuman og mga programa alang sa kaayohan sa iyang mga tawo.

Unsa may gusto ninyo, ang mga tawo nga sayon-sayonon lang sa pag-agbay-agbay unya tunolan lang dayon og dukomento aron papirmahon? Resulta, bulilyaso.

Apan ang ako g'yod hinoong gusto mao nga ang mga konsehal, kinahanglang duna g'yod unta'y susama nga gidaghanon sa oposisyon ug sa administrasyon.

Pinaagi niini, nindot ang pagdumala sa kagamhanan.

* * *

Wala may "epek" ang pagsirado sa Kapitolyo sa access road nga magdugtong unta sa Don Mariano Cui (duol sa Chong Hua Hospital) paingon sa Fuente Osmeña.

Kon sirad-an pa hinoon sa Kapitolyo ang dugang mga karsada nga giingong nahimutang sa ilang yuta, daghan nang mga tawo nga angay'ng masuko ni Gobernador Gwen Garcia.

Mao na, kay nahinaykan na man ninyo, diha na lang kutob. Ayaw na dugangi aron dili magdaku ang inyong panagbangi.