Sensirong serbisyo

Kadudahan g'yod nga tigamitan og illegal nga drugas kadtong duha ka polis kang kansang mga identification cards ug police badge nakit-an didto sa usa ka suyopanan og shabu nga gironda sa mga polis niadtong Lunes.

Kinahanglan nga dili malimot ang mga imbistigador sa kapolisan nga dunay lagda nga kon ang usa ka polis mawad-an og police ID o kaha badge, ila dayon kining i-report ngadto sa opisina sa director for personnel.

Atong ibutang nga tua sila madistino sa Regional Mobile Group sila si PO1 Sherif Goopio ug PO1 Julieto Elarcosa, dili na kinahanglang moadto pa sila personal sa Police Regional Office-7 sa pagreport kon nawala ang ilang ID ug badge.

Ila ra kining i-report ngadto sa ilang commander sa RMG-7 nga mao nay mohimo og report, apil sa daily journal, nga ipadala sa PRO-7 sa tumong nga mahibaw-an nga nahanaw ang maong mga butang.

Sa ingon nga paagi, malikayan ang pagduda nga sila nalambigit sa mga binuang kon ang maong ID ug badge nga giisyu sa kagamhanan kanila, makuha og laing mga tawo ug gamiton sa dautan.

Suheto kaayo ko niining maong lagda kay sa ako nang gikaingon kaninyo, nag-agi ko pagka police/military reporter sulod sa 11 ka tuig. Karon, anaa na sa mga imbistigador ang pagtimbang-timbang.

Tambag hinoon nako sa kadagkoan sa PRO-7 nga sila si Elarcosa ug Goopio maayong himoan og surprise drug test aron pagsuta kon mogamit ba sila og illegal nga drugas.

Ang pagduda karon mao nga silang duha, mga drug users.

* * *

Mora'g madayon na g'yod pagka konsehal ang higala nako nga si Art Barrit kay mora'g siya maoy napilian ni Mayor Tomas Osmeña nga ipuli sa mabakante nga pwesto sa north district nga talikdan ni Konsehal Gabriel Leyson.

Aw, kon mapili si Barrit sa maong katungdanan, dili g'yod magmahay ang katawhan kay may katakus man g'yod si Art nga makiglantugi aron ipatigbabaw ang kaayohan sa katawhan.



Dili ikalimod nga dunay mga konsehal diha sa konseho sa dakbayan nga walay tingog-tingog atol sa mga sesyon. Suheto niini ang katawhan kay ang tibuok sesyon makita pinaagi sa Cable Channel 14.

Si Tommy hinoon, pabiling kalma kay wala pa man g'yod siya'y klarong kontra nga makahulga sa iyang kandidatura.

* * *

Sa Mandaue, pwerteng nindota sa mga programa de-gobiyerno ni Jonkie Ouano, nga nangambisyon nga mag-mayor puli sa iyang amahan.

Tan-aw nako, kon modaug si Jonkie, molambo g'yod ang Mandaue, apil na ang iyang mga lumulopyo.

Mga batan-on nga taga Mandaue, gikataho nga naghinam-hinam na nga motambong sa mga rally nga pagahimoon sa kampo ni Jonkie ug sa iyang bise nga si Carlo Fortuna.

Matud pa nga gawas sa kaambongan sa duha, ang mga batan-on nagtinguha nga hulipan og mga tawo nga presko pa kaayo og pangisip ang mga magdumala sa ilang kagamhanan.

Dili hinuon kalikayan nga duna say mga nanaway nilang Jonkie ug Carlo kay anaa man sila sa pikas kampo.

Nabasa nako ang programa ni Jonkie nga gipublikar sa mantalaan nga ang kalamboan nga naangkon sa Mandaue - pinaagi sa iyang amahan nga si Mayor Thadeo Ouano - buot niya nga mapahimuslan kini ngadto sa labing kabus, sama sa paghatag kanila og sensiro nga "health services."

Mahimo kini pinaagi sa pagmugna og mga proyekto ngadto kanila, ilabi na ang pagtabang nga makabaton sila og mga negosyo nga sarang kakuhaan nila og dugang kinitaan.

Kon imong tagsa-tagsaon og suwat, dili masulod dinhi sa atong lindog.