Nindot kaayo ang SRP, apan...

Nindot gyud kaayo ang South Reclamation Project. Di ni malalis, ug way makiglalis niini. Apan, unsa man?

Sukad ni natukod, wa pa ta ka-sapi niini. Apan, sige tang bayad sa dakung interest matag adlaw. Naa diha padong ang bulk sa atong nagnihit nga kuwarta sa dakbayan.

Way labut nga mao kini ang nakaingon sa panagbangi nila ni Tomas ug EddieGul, hangtud nga gustong Tomas nga iyang ilugon ang liderato sa Talisay gikan sa mga Gullas. Apan iya unang ibalik ang Talisay sa pagka-lungsod aron nga kon mudaog si Gabby Leyson, usa na lang ka lungsod ang iyang dumalaon, dili siyudad. Lagmit wa mosalig si Tomas nga kaya ni Gabby ang usa ka dakbayan. Mao nga kinahanglan ibalik pagka-lungsod.

Anyway, morag husto si Sonny Osmeña. Gusto lang niyang protektahan ang mga Sugbuanon gikan sa pagwaldas sa salapi sa lungsod.

Alang kang Sonny, ang SRP dili priority. Naa pay laing services nga nagkinahanglan sa unang mga pagtagad. Iya gihisgutan ang garbage collection, road improvement nga gipili lang ang maagian sa mga bisita sa Summit, ang city hospital, ang squatting, peace and order, ang environment nga gipasagdan lang, ug daghan pa.

Karon, napasagdan kining tanan, tungod kay tua ibubo sa SRP ang labing daku nga gahin sa dakbayan. Ma-proven right ra si Sonny sa tukmang panahon, diin waa na tay mahikap nga salapi alang sa ubang mga services sa dakbayan.

Kon buhi pa ron si Serging, lagmit iyang tambagan ang iyang anak nga ilang-langan langanon ang SRP, hangtud nga mapuno ug makasapi nag husto ang iyang reclamation project nga kapin nag 50 ka tuig ang gidugayon gikan sa pagkatukod niini.

Akong usbon, nindot gyud kaayo ang SRP, di ni malalis. Apan unsa man? Ang naka-nindot ray nag-ayo niini, ug ang kahapsay ug convenience sa mga motorist nga mag-ngadto nganhi sa Talisay City ni Gullas.

Apan, in the meantime, nagbaguod tag bayad sa interest lang, hinikalimtan ang mga basic services alang sa mga Sugbuanon.

Kanus-a pa kaha ni magsugod og pasulod og kwarta nganhi sa atong panudlanan sa dakbayan? Pagkadimalas sa mayor nga mosunod unya ni Tomas. Di ba, Dro?