Ang duha nga nadugang kabahin ni sa lima nga gisubpoena niadtong Biyernes ni Special Investigator Jedidah Hife aron moluwat og affidavit batok sa pari nga ilang gipasanginlang nanghinol ug nagbinastos nila atol sa Life in the Spirit Seminar nga gipasiugdahan sa Oasis of Love didto sa Abellana National School niadtong Nobiyembre.
Sa lima ka mga gisubpoena, tulo lang ang mitungha, duha ang nisang-at og reklamo samtang ang usa di na interesadong mokiha sa pari. Karong adlawa ug unya sa Miyerkulis ug Biyernes laing tag-lima ang gipatawag sa NBI.
Apan karon palang gani nasagmuyo na kaayo si Hife tungod kay ang mga ginikanan ug ang ubang mga biktima mismo dili interesadong mangayo og hustisya sa ilang gidangatan.
Gani niadtong Biyernes, usa sa duha nga nadungang sa misang-at og reklamo nagdiki diki unta pagpirma og affidavit tungod kay ang iyang inahan dili gusto nga mokiha. Matud sa inahan nga di siya gusto ug gubot kay matud niya basin og mao kini ang mamahimong hinungdan nga mag-away siya sa iyang bana.
Niingon pa ang inahan sa usa sa mga biktima sa pari nga gihatagan lang og malisya sa mga bata ang gihimo sa pari nga pagpanghinol ngadto nila ug ang pagpitik pitik sa strap sa bra sa mga tinun-an nga mikompisal.
Tungod sa gihimo sa inahan, nakatilaw siya'g kasaba gikan ni Hife, nga niadtong tungora nalooy na kayo sa bata nga gusto gyong mosang-at og reklamo. Human sa kasaba napugos ang inahan pagsugot nga mokiha ang iyang anak.
Di matukib sa pulong ang gibati sa bata, makita kayo sa iyang panagway ang iyang kalipay nga niuyon na ang iyang mama nga mosang-at silag reklamo.
Tungod sa maong kasinatian, gitun-an karon ni Hife ang posibilidad nga ilakip og kiha ang mga ginikanan nga magmagahi pagsuporta sa ilang anak.
Ang pagdili sa mga ginikanan sa ubang mga biktima nga mokiha ang ilang anak batok sa pari alang nako laing nawong sa pagpangabuso. Husto ang lakang sa NBI nga kon mahimo ilakip kadtong mga nagmagahi nga ginikanan pagkiha uban sa pari.
Labing maayo nga masabtan sa mga ginikanan nga ilang obligasyon ang pagpanalipod sa ilang mga anak gikan sa bisan unsang matang sa pagpangabuso ug ang ilang kapakyas paghimo niini ilang tulobagon sa balaud.