Karatola

Upat ka buwan nalang eleksiyon na, karon palang gani kanunay na nimong igkita ang mga politiko nga gustong mokandidato. Kon unsa ka aslom ug kangil-ad og batasan ang maong mga politiko, pwera lang sa maayo, ingon sab katam-is ang ilang pahiyom karong panahona.

Kon niadtong layo pa ang eleksiyon, imong makit-an ang mga karatola diha sa opisina niining mga reelectionist sa ma sa "no visitors allowed" "do not disturb" ug "no solicitation" karon di na kinahanglang imong pangitaon ang maong mga politiko tungod kay sila na mismo maoy moduol ninyo aron sa pagpanglamano uban ang pasalig nga kon sila pilion pag-usab abli kanunay ang ilang ganghaan ug mga buhatan nga modawat aron pagsirbisyo.

Karong panahuna maoy atong higayon nga panimaslan ang mga politiko nga di kamaong motuman ug saad pagsirbisyo sa ilang mga molopyo. Numero uno natong bantayan sa mga politiko karong panahona mao ang maayo kaayong moluwat og pasalig labi pa kadtong mga imposibli na kaayo nga mahatag.

Laing angayan natong bantayan kadtong mga nagpahimus sa ilang gahum pinaagi sa paggamit sa kwarta sa gobyerno pagpamintaha sa ilang kaatbang. Dunay uban, labi pa kadtong mga nagtinguha nga molansar pagka senador ang migamit sa ilang posisyon aron pagmando sa mga ahensiya sa gobyerno sama sa Philippine Information Agency aron pag-arrange og press conference alang nila.

Pipila sa mga kandidato nga angayan natong bantayan ug isalikway sa umaabot eleksiyon mao silang Mike Defensor ug Chavit Singson. Ang duha dinhi sa Sugbo niadtong Sinulog apan nahibawo ba mo og unsay gihimo sa duha ka mga baga'g nawong nga mga opisyal, ilang gisugo ang PIA nga magpatawag og media alang nila didto sa ilang hotel.

Si Miss Fayett Reñen sa PIA-7 nagkabuang intawon og panawag og reporter nga niadtong higayona labihan ka busy sa coverage sa sinulog. Ang mga reporters, gibiyaan ang ilang coverage ug nagbaktas paingon sa Waterfront Hotel sa Lahug uban ang pagtuo nga dunay dakong pahibawo ang Chief of Staff ni Presidente Gloria Macapagal Arroyo.

Apan, paghiabot sa mga reporters didto, ila ra diay'ng ipahibawo nga molansar sila pagka senador. Taym pa ra gud, official function ba gud to ang ilang gihimo nga kinahanglan man nilang gamiton ang PIA pag organize og press conference?

Ubos sa lagda sa Civil Service gidid-an man ang mga empleyado sa gobyerno nga naghupot og career positions nga molambigit og mga partisan political activities. Apan akong nasayran nga gilingla ni Defensor ug Singson ang PIA, gipatoo nga official ang kalihukan nga gusto niyang ipahibawo sa media hinungdan nga gisanong ang iyang awhag nga mopatawag og press conference.

Bata pa si Defensor, apan taliwa sa iyang batan-ong pangidaron maaninaw na kaayo ang batasan sa usa ka trapo diha kaniya.

* * *

Ang hepe sa kapolisan sa rehiyon, C/Supt. Silverio Alarcio, Jr., mitug-an sa DYLA kagahapon nga kapin sa 20 ka mga lungsod ug dakbayan dinhi sa Central Visayas ang naa sa ilang listahan nga posibling mamahimong areas of concern sa Commission on Election karong tuiga.

Kini tungod sa mga bayolenting panghitabo sa miaging eleksiyon ug sa init nga panagribal sa politika ingon man ang presensiya sa mga armadong tawo sama sa mga rebeldi sa maong mga dapit. Si Alarcio miingon nga iya nang gipresentar ang maong listahan atol sa command conference nga gipatawag sa Comelec didto sa kaulohan niadtong miaging adlaw.

Ang Comelec dinhi sa lalawigan hinuon miila sa mga lungsod sa Daanbantayan ug Madridejos ingon man sa mga dakbayan sa Toledo ug Lapulapu nga lakip sa mga dapit nga ilang gitan-aw nga areas of concern alang sa umaabot eleksiyon.

* * *

[email protected]