Kalampusan sa seguridad

Karon maoy katapusang adlaw sa 12th ASEAN summit dinhi sa Sugbo ug hinaot nga magpadayon ang kalampusan sa atong mga tinugyanan sa balaod pagmintinar sa kahapsay ug kalinaw ingon man pagsanta sa mga dautang elemento nga nagtinguha pagmugna'g kasamok ug kagubot.

Karon pa lang akong itunol ang dakong pahalipay ngadto sa atong mga sakop sa kapolisan, military, National Bureau of Investigation ug sa uban pang mga ahensiya nga nalambigit sa pagpatuman sa hugot nga seguridad atol sa upat ka adlaw nga international event.

Ang gipakitang katakos ug kahanas sa mga tinugyanan sa militar, kapolisan ug sa NBI paghatag og seguridad sa mga delegado ug pagsiguro nga way bisan unsa nga dautang panghitabo atol sa maong kalihukan di hilabwan.

Atong napakita atubangan sa international community nga way igong basihanan ang mga travel advisories nga giluwatan sa ubang mga nasud nga nag-awhag sa ilang mga citizen paglikay nga mobiyahi dinhi sa Sugbo.

Gawas niini atong napada ang mensahe ngadto sa ubang mga nasud nga bisan pa sa mga nanghitabong kagubot sa Mindanao taliwa sa mga pagpamomba luwas pa gihapon ang dakong bahin sa nasud labi pa ang Sugbo gikan sa maong mga kagubot.

Labaw sa tanan angayang saludohan ang mga sakop sa National Organizing Committee ug sa Cebu Organizing Committee sa kalampusan sa maong kalihukan. Kun atong tuohan ang sulti sa atong mga opisyal dako ang benepisyo sa ekonomiya nga makuha sa Sugbo sa atong pag-host sa maong kalihukan.

Hinuon wa pa nato ni makita ug mabatyagi apan way mawa nato kon atong tuohan ang ilang pasalig. Hinaot nga ma-translate ngadto sa mga benepisyo sa katawhan ang dungog nga atong nakuha gikan sa malampuson natong pag-host sa ASEAN summit.

Apan luyo sa kalampusan sa atong pag-host sa ASEAN summit, di pa hingpit nga kapanulisok ang mga tigpasiugda sa maong kalihukan ngadto sa mga tawo nga kusog kaayong nanaway niini.

Kini tungod kay bisan sa malampuson nga kalihukan nagpabilin ang pasangil nga daghan sa mga opisyal sa atong gobyerno ang nakapahimulos niini pinaagi sa pagpaburot sa ilang kaugalingong mga bulsa.

Hinaot nga di ni maoy ilang gipasabot nga kaayohan nga makuha nato sa ASEAN nga paburoton ang ilang kaugalingong bulsa gikan sa anomalosong mga transaksiyon nga ilang gisudlan.

Hangtud karon wa pa ma- esplikar sa mga opisyal sa DPWH ang ilang gikatahong pagpaburot sa presyo sa mga lamp post nga gibutang diha sa ceremonial route ug ang paghatag sa kontrata sa surveillance camera ngadto sa diskalipikadong kontraktor.

Gawas nga didto nila ihatag sa napilding kontraktor gipaburot pa gyud og maayo ang unang presyo sa kontrata, kini sigun sa pasangil sa nakadaog unta nga kontraktor.

* * *

E-mail: [email protected]