Pagbuntog sa kaminghoy

Niangkon si Cebu City First Lady Margot Osmeña nga dakong hagit ang pagpukaw pagbalik sa kadasig sa mga Sugbuanon alang sa 12th Asean Summit karong semanaha. Sa iyang pagtambong sa Kulokabildo.Com sa DYAB Abante Bisaya nga gihimo sa Ayala Activity Center, si Osmeña nitug-an nga, sama sa kinabag-an sa katawhan, silang mga tigpasiugda naminghoy sab sa pagkauswag sa summit.

Si Cebu City Asean Task Force Coordinator Nagiel Banacia nanghinaot nga kapahinumdoman ang mga Sugbuanon sa mahinungdanong papel nga ilang huptan pagtino sa kahapsay ug kamalampuson sa summit pinaagi sa dry runs ug makanunayong mga pahimatngon sa mga tigpasiugda pinaagi sa media. Si Urban Poor Leader Edward Ligas nidawat sa hagit nilang Osmeña ug Ambassador Vic Lecaros, laing dinapit sa tulomanon, nga bisan sa nahiagomang demolisyon, motabang ang mga kabos nga taga dakbayan paglimpiyo sa kadalanan ug pagbantay sa mga dayandayan sa ruta sa summit.

* * *

Nakugang ang nasudnon ug langyawng mga sakop sa media sa talan-awon nga nisugat sa ilang pagbalik sa Cebu International Convention Center (CICC) gahapon-usa ka buwan human sila naahat pagbiya sa kontrobersiyal nga building dihang giuswag ang Asean Summit: Wa pa gyod diay mahuman ang gideklarar sa mga tigpasiugda nga bag-ong landmark sa Sugbo; may mga trabahante pa nga nagpadayon pagtrabaho sa sawog ug ubang bahin sa CICC.

Ang Agence France Presse (AFP) nitaho nga apil sa gitrabaho mao ang sawog nga naguba tungod sa salibo sa uwan gikan sa ganghaan, ang airconditioning unit nga gibutang sa ground floor ug ang exhibition hall nga gihimong meeting room. Nipasalig hinuon si Architect Manuel Guanzon nga mahuman nang trabaho gabii. Kon nakalimot na mo, si Guanzon say nipasalig nga mahuman nang CICC niadto pang Nobyembre 15 sa niaging tuig. Sa di pa ko pasanginlan nga wa mahigugma sa Sugbo, malipayon kong motaho ninyo nga wa na magtulo ang CICC bisan sa pagbunok sa uwan sa niaging mga adlaw.

* * *

Ang AFP, nga usa sa labing dakong news organization sa kalibotan, mao say nakahatag sa labing detalyado nga taho mahitungod sa pagkabuslot sa CICC sa kusog nga uwan nga dala sa bagyong Seniang duha ka adlaw human giuswag ang summit sa niaging buwan. Tungod sa kamaikugon sa lokal nga mga sakop sa media, ang ubang bahin sa kalibotan maoy unang nahibawo nga giputos og plastik ang x-ray machine sa ganghaan ug nagkatibuwaag ang nahibiling mga peryodista sa media center aron di mabasa sa nagtuasik nga uwan nga nakalusot sa atop ug bungbong sa CICC. Ang AFP nga nagbase sa nasud nga nahimutangan sa makasaysayanong Eiffel Tower mao ra say nakapangahas sa paghulagway sa world class nga CICC, pila ka adlaw sa pa sila mabasa sa salibo sa uwan sud sa building, nga "baratuhon nga shopping mall nga way bintana."

* * *

Email: [email protected]