EDITORYAL - 'Baptism of fire' ni Comendador

Bag-o pa gani nakalingkod si Sr. Supt. Patrocinio Comendador isip hepe sa Cebu City Police Office morag gitestingan dayon sa mga tulisan ang iyang katakus.

Sa unang adlaw ni Tsip Comendador, diha dayon toy tulis nga nahitabo sa usa ka lending firm nga di kaayo layo sa Camp Sotero Cabahug.

Pagkasunod adlaw, laing tulis ang nahitabo diha sa Talamban diin ang usa ka kooperatiba maoy gibiktima sa tulo ka tulisan.

Kining gitawag sa Iningles nga "baptism of fire" alang kang Comendador wala kaayo makapabalaka sa mga tigpaniid nga nasayod sa katakus ni Comendador sa pakigbugno sa mga tulisan.

Dako ang pagsalig ning maong mga tigpaniid nga ang bag-ong hepe sa CCPO adunay ikabuga batok sa mga kriminal nga nia dinhi mag-operate.

Apan manghinaut lang gihapon kita nga mahimo niya ang wala mahimo sa iyang bibansan. Ug atubangan sa mga pagdayeg sa iyang katakus kita moingon: Puwera buyag.