Irresponsable'ng opisyal

Politika maoy daling gidat-ulan ni konsehal Eugenio "Jing-jing" Faelnar nganong nidako ang isyu sa iyang pagdasmag sa usa ka tawo didto sa iyang barangay. Matud niya gipadako kuno ang maong hitabo sa iyang kaatbang sa politika.

Kon mahinumduman usa ka Reynante Laurente ang naglakaw diha sa gawas nga bahin sa Metropolis Hotel sa dihang gidasmagan siya sa gimanehong brand new Toyota Fortuner ni Faelnar.

Human niya madasmagi, gibiyaan ni Faelnar ang nag-agongoy nga biktima ug gipasagdan ang iyang mga tanod maoy modala niini didto sa tambalanan. Dugay niangkon si Faelnar nga siya maoy nakadasmag apan sa ngadto ngadto iyang giangkon nga wa to niya tuyoa.

Matud niya di siya buang nga iyang idasmag ang brand new niyang sakyanan. Apan sa dihang gipangutana nganong wa niya tabanga ang biktima, matud niya wa siya manaog tungod kay nagtaligsik hinungdan nga iyang gisugo ang iyang mga tanod nga maoy modala niini sa tambalanan.

Ang gipakita ni Faelnar nagpa-ila kon unsa ka iresponsable siya nga matang sa pagka opisyal. Posibling nahadlok siya mokarga sa biktima sa iyang bag-ong sakyanan kay basin og kini magkabuling.

Pero ang gihimo ni Faelnar inay nga magpaubos ug mangayo og pasaylo mao pa hinoon kini'y arogante kaayong manubag ug daw sa nakaminus pa sa iyang biktima. Di pa igo, gipun-an pa ang iyang sayop sa pagpahid og bulok sa politika sa maong hitabo.

Ang sayop ra gyud intawon ni Laurente mao nga ang iyang igsuon, katabang ni Atty. Salvador Solima nga kaatbang sab sa politika ni Faelnar.

Ang tinuod si Faelnar maoy nagpadako sa maong hitabo tungod kay kon iya pang giatiman ang iyang biktima ug gidala sa tambalanan posibli ganing wa gyud ni tagda sa mga sakop sa media ang maong hitabo.

Apan tungod sa iyang pagsuway unta og talikod sa iyang tulobagon ug sa iyang arogante nga mga pamahayag mao ni'y hinungdan nganong nidako ang maong hitabo.

* * *

Tataw nga "consuelo de bobo" lang alang sa mga mamumuo ang gipasar sa kongreso nga P125 across the board legislated wage increase tungod kay way kasigurohan nga molusot kini sa Senado.

Hangtud nga dunay susamang balaudnon nga maaprobahan sa Senado ug maaprobahan sa bicameral, di kini maangkon sa mga mamumuo.

Si Kongresista Loreta Ann Rosales sa Akbayan admitido nga gamay ra ang tsansa nga mapatuman ang maong usbaw.

[email protected]