EDITORYAL — Daghang patay sa hugaw nga hangin

Daghang mga tawo sa Asya ang nangamatay ug mangamatay pa gyud tungod sa air pollution kun hugaw nga hangin.

Kini sumala sa pagtuon sa Asia Development Bank kun ADB.

Suma pa sa ADB ang air pollution niabot na sa grabe kaayo nga situwasyon sa daghang mga siyudad sa Asya gumikan sa "urbanization and motor vehicle use."

Gihisgutan man sa ADB ang mga sakyanang de motor kun motor vehicles isip gigikanan sa air pollution, ato sab nga hisgutan ang mga sakyanan dinhi sa atong siyudad nga kusog kaayo mobuga og hugaw'ng aso sa ilang mga tambutso.

Ato kining gitawag nga smoke belchers ug daghan kaayo niini ang nagdagan sa atong kadalanan.

Matag karon ug unya makabasa kita sa mga pamantalaan nga dunay gilusad nga kampanya batok ning mga smoke belcher. Apan tungod kay dili man "sustained" kun sigi-sigi ang maong kampanya wala gihapon masulbad ang problema nga mugna sa mga sakyanan nga kusog mobuga og aso.

Hinaut unta nga ang report sa ADB makapamata sa mga ahensya nga gisangonan sa pagsulbad sa problema ning maong smoke belchers.