Tabang sa Sugbo

Dul-an na sa P500,000 nga balor sa hinabang ang nadawat sa gipalapdan nga Kapamilya Relief Campaign sa DYAB Abante Bisaya ug ABS-CBN Cebu alang sa mga biktima sa Bagyong Reming sa Bicol, Seniang sa amihanang Sugbo ug Kabisay-an ug sunog sa Barangay Luz sa Dakbayan sa Sugbo. Ang 20-footer nga container van nga puno sa pasiunang relief goods gikan sa Sugbo napada na sa ABS-CBN Foundation pinaagi sa Gothong Southern Shipping Lines niadtong Miyerkules sa gabii. Hapit na sab mapuno ang ikadugang container van nga gipahimutang sa ABS-CBN Regional Broadcast Complex sa Jagobiao, Mandaue City.

Nahatagan na sab og pasiunang hinabang ang 39 ka pamilya nga naigo sa sunog sa Sitio San Roque sa Bo. Luz atol sa Barangay Kapamilya sa DYAB ug TV Patrol Central Visayas niadtong Huwebes. Ang matag pamilya nakadawat og lima ka kilong bugas humay, lima ka latang sardinas, napu ka paketeng noodles ug usa ka sakong used clothing. Makiglambigit sab mi sa lokal nga mga opisyal sa amihanang Sugbo aron kahatagan nag hinabang ang mga biktima ni Seniang.

* * *

Ang labing dako ug labing uwahing hinabang mao ang P140,000 nga tseke sa Fairchild Semiconductor ubos sa liderato sa ilang managing director nga si Rodulfo L. Bollozos. Ang mga kawani sa Fairchild nagkauyon pagtampo sa ilang mga benepisyo sa vacation leave nga gi-convert sa management ngadto sa cash ug gitugbangan og samang kantidad isip ilang pinaskohan sa mga biktima sa katalagman.

Sa kinatibuk-an, nadawat na namo ang dul-an sa P200,000 nga cash ug tseke, kapin sa 100 ka sakong bugas, kapin sa 300 ka kahon nga sardinas ug ubang delata ug noodles, upat ka kahon nga binotelyang mineral water ug kapin na sa 500 ka sakong asukar, mga gamit sa kusina ug panimay ug mga duwaan.

Magpasalamat mi sa tanang mga Sugbuanon nga sa makausa pa nimatuod sa ilang kamanggiluy-on ug kamanggihatagon alang sa katawhan nga nagkinahanglan sa ilang dinaliang tabang.

* * *

Maayong balita: Mahimong mub-on ni Japanese Prime Minister Shinzo Abe ang iyang biyahe sa Uropa aron makatambong sa Asean Summit dinhi sa Sugbo nga gitakda sunod buwan. Di maayong balita: Ang Malaysia niisa na sa kahigayonan nga di makatambong sa tanang 16 ka heads of state sa Asean ug East Asia.

Sa iyang bahin, si Japanese Economic, Trade and Industry Minister Akira Amari, nga suod kaayong Abe, nisubli pagsugyot nga di pasagolan og mga turista ang mga delegado sa ilang hotels sa Sugbo, sama sa gihimo sa Vietnam sa Apec Summit sa niaging buwan nga gitambongan ni US Pres. George Bush. Human naalkanse sa nauswag nga summit, masabot kaayo kun ang hotels sa Sugbo moisnab ni Amari. Apan hinaot na-leksiyon na. Ang summit di angay'ng himuong kahigayonan pagbunal sa langyaw'ng mga bisita.

* * *

Email: leo_lastimosa@abs-cbn.com