EDITORYAL - Lakang batok sa mga dispatser

Gihangop sa pipila ka mga sektor sa atong komunidad ang pagpataas sa multa batok sa mga passenger dispatcher isip usa ka paagi nga masulbad kining problema bahin sa "dispatching" sa mga pasahero sa pampublikong sakyanan.

Ang multa nga P200 gipatas-an ngadto sa P5,000 ubos sa ordinansahon nga gipangamahan ni Konsehal Raul Alcoseba.

Daghan ang nagtuo nga ang maong pagpaumento sa multa makapahunong na sa mga kalihukan sa mga dispatser kinsa ginganlan sa mga drayber sa PUJ nga extortionist kon mangingilkil.

Inigkapasar sa ordinansahon ni Konsehal Alcoseba segurado na kahang maundang ang kalihukan niining mga badlongong dispatser?

Makapahadlok tuod ang dakong multa apan kon dili ipatuman ang ordinansa dili gihapon mahadlok ang mga tang-ang dispatser sa dakong kantidad nga ilang sagubangon kon sila madakpan.

Ang implementasyon kun sobsob nga pagpatuman sa balaod maoy makasulbad sa problema nga mugna niining mga dispatser.