Si Dumpit na pod?

Kaniadtong miaging Sabado sa atong tulumanon sa Saksi Evening Edition sa DySS Super Radyo Cebu gireklamo sa uyoan sa usa ka Santiago Nacorda si SPO1 Adonis Dumpit, kana gumikan kay matod pa mihapos kini og handheld radio ngadto kang Santiago Nacorda. Sigon sa asoy sa reklamante nga giparking ni Santiago Nacorda ang iyang motorsiklo daplin sa dalan sa may Martires dihang mikalit lang paggawas ang sakyanan sa luyo nga bahin sa Bagong Buhay Rehabilitation Center (BBRC) nga nagi-kis-ikis ang dagan ug dayong bangga niini sa motorsiklo. Tungod kay mipaturatoy lamang ang nagmaniho sa nahisgutang sakyanan, gigukod kini ni Santiago Nacorda hangtod nga iyang naabtan sa unahan ug sa pag-abli pa sa pultahan, dagway ni SPO1 Adonis Dumpit ang iyang nakit-an. Iya kining gipangutana kon nganong gidasmagan niini ang iyang motorsiklo apan inay mangayo og dispensa sa nahimo, gibunalan na hinuon kini sa radyo nga gikuptan nga miresulta ngadto sa iyang pagkabarag ug dayong pagkatumba. Inay tabangon ni Dumpit sa iyang pagkatumba, giposasan na hinuon ang biktima ug gikuha pa ang iyang pitaka nga maoy gisudlan sa iyang duha ka libo kapin nga suweldo nga iyang gitagana para gastoanan sa ilang fiesta sanglit siya ang presidente sa ilang kapilya. Giuli man tuod ngadto kaniya ang iyang pitaka pero wala na ang sulod niining kuwarta.

Kining maong mga pasangil hugot nga gipanghimakak ni SPO1 Adonis Dumpit nga nahinabi gihapon sa Super Radyo.

Kung tinuod man ugaling kining maong mga pasangil nga gibato ni Santiago Nacorda ug sa uyoan niini batok kang SPO1 Adonis Dumpit kinahanglan nga ila kining ipaabot ngadto sa kadagkoan sa atong kapulisan o ba kaha sa mga ahensiya sa gobyerno nga gitahasan sa pagtan-aw niadtong mga police nga nag-abuso sa ilang katungdanan. Kinahanglan nga pormal kini nilang ipaabot sa mga ahensiyang hingtungdan.

Kasagaran ugod sa mga giabusohan sa police igo man lang magtagawtaw unya dili diay ipaabot ang ilang reklamo ngadto sa ahensiyang hingtungdan kay mahadlok sa police nga ilang gireklamo. Unsaon man pagkadisiplina ning mga police nga nag-abuso kun ugaling walay mobarog sa reklamo?