Pamalandong Matag Domingo
Nobiyembre 19, 2006: Ikakatloag tulo nga Domingo sulod sa tuig
Mga Pagbasa: Dn. 12:1-3/Hb. 10:11-14.18/Mk. 13: 24-32
Basta maghisgut na gani kita og katapusan sa panahon, kalisang gyud dayon ang mohari sa atong galamhan. Linog, Bagyo, Katalagman, Binanggaay sa mga Planeta ang mga mahulagway gyud sa atong naglatagaw nga hunahuna. Ang maong kahadlok maoy nagtukmod sa kadaghanan aron mohimo dayon og mga dinaliang kabag-ohang moral. Ang maong mga gipaabot nga mahitabo ang nagukmod sa kadaghanan aron maningkamot nga makahatag og mga donasyon labina gyud sa mga nagkinahanglan.
Kining mga buhat sa tawo timaan lamang ang kadaghanan dili pa gyud andam nga makig-atubang sa ilang hari og manluluwas nga way lain kondili ang Ginoong Dios sa tanang kabuhatan. Daghan kanato ang nahilansang lang gihapon sa Ningas Cogon nga kinaiya. Magkara-kara na lang hinuon og inig abot na sa takna. Apan ang pangutana, kanus-a man kini mahitabo? Bugtong Dios lamang ang masayud. Kay bisan ang mga timaan dili makahatag kanato og tinong tubag.
Ang mensahe alang kanato mao: " PANGANDAM" sa kanunay. Pangandam nga wala magpasabut og passivity. Pangandam nga nagkahulogan og makanunayong paggamit sa sentido komon aron sa ingon magamit ang tanang mga butang nga sa Dios kanato gihatag. Bulawanon ang matag gutlo mao nga kita molihok gayud og dili magtinanga tungod sa walay kapuslanang kahadlok. Mentras tanto, mag-ampo kita alang sa kalampusan sa ASEAN Summit pohon....