Sugal sa Tangke

Kining sugal naa gyod sa bisan asang dapit. Lisod kining sumpoon kay ang mga mananakop ra man ang bantayan sa mga sugarol. Sa ubang dapit gani, dunay sugal nga gipaluyohan gyod sa pipila ka badlongong mga tigpatuman sa balaod. Mangayo lang silag 'tong' sa mga sugarol ug dili na dakpon.

Dugang niini, may nadawat kong text nga nagkanayon: "Sir, aduna koy reklamo bahin sa among dapit sa Sitio Rattan, Tangke, Talisay. Bahin kini sa sugal. Bisan gabii na kaayo, padayon ang sugal sa bingo, hantak ug moapil pa ang mga bata." -- 0916-4275930 (Oct. 13, 2006 -- 12:33:54)

Basin walay kasayoran niini ang mga opisyal sa barangay Tangke, maayo nga himoan nila kini'g pakisusi. Dili maayo kon pasagdan lang kini ilabi na nga may mga bata pa (sumala sa taho) nga moapil sa sugal. Dili gyod moundang bisan gabii nang dako. Kini ra bang sugal usa sa mga hinungdan nga mahitabo ang lain pang salaod sama sa pagpangawat ug pagpanulis. Kay kon wala nay kuwarta nga ikasugal ug walay trabaho ang usa ka sugarol, mapugos siya paghimo'g dautan aron makakuwarta ug makasugal.

Ang mga opisyal sa barangay maoy mas nasuheto sa ilang dapit busa sila ang angay mohimo'g unang lakang batok niini. Kon ilang masuta nga tinuod nga grabe gyod ang sugal diha sa Sitio Rattan, Tangke, Talisay, labing maayo nga makig-coordinate sila sa kapolisan aron masumpo kining mga kalihokan nga ingon niini.

* * *

Dili pa lang dugay nagteksanay mi si Dr. Daan Dionson. Iyang gitug-an nako nga hangtod karon nagpadayon pa gihapon ang kalihokan sa mga fixer sa Mandaue LTO. Maluoy god siyang magtan-aw sa mabiktimang mga aplikante.

Nganong nagpadayon pa man ang operasyon sa mga fixer diha sa Mandaue LTO. Gituyo ba nga pasagdan lang sila? Siyaro na man sab kon dili pa identified ang maong mga fixer diha sa maong buhatan hangtod karon. Angay gyod pangitaa'g paagi nga masanta kanang mga fixer kay dili maayo kanang ilang gihimo.

* * *

(Sumbong ug reklamo? Text sa 0910-8105522)